Miarkuje dyrektar Respublikanskaha navukova-praktyčnaha centra «Maci i dzicia» Kanstancin Vilčuk.
Takoje mierkavańnie 21 listapada vykazaŭ dyrektar Respublikanskaha navukova-praktyčnaha centra «Maci i dzicia» Kanstancin Vilčuk u čas online kanfierencyi na sajcie BIEŁTA.
«Alternatyŭnyja (chatnija) rody — heta viartańnie ŭ kamienny viek», — adznačyŭ śpiecyjalist. Jon rastłumačyŭ, što ciapier u Biełarusi akazvajecca kvalifikavanaja dapamoha, u tym liku i pry rodadapamozie. Na rodach prysutničaje nie tolki akušerka, ale i ŭrač-hiniekołah, urač-nieanatołah i h.d. «Niahledziačy na toje, što rody — heta fizijałohija, nikoli nichto na 100 pracentaŭ nie moža sprahnazavać, jak budzie iści situacyja.
Kali heta budzie ŭ śpiecyjalizavanaj lačebnaj ustanovie, lubuju situacyju my možam vyrašać pa chodu rodaŭ»,
— dadaŭ śpiecyjalist. Jon taksama nahadaŭ, što ŭ miedustanovach, jakija zajmajucca rodadapamohaj, jość takaja pasłuha, jak indyvidualnaje viadzieńnie rodaŭ.
U svaju čarhu hałoŭny akušer-hiniekołah Ministerstva achovy zdaroŭja Alaksandr Barsukoŭ adznačyŭ: «Pa zakonu my akazvajem akušerskuju dapamohu va ŭstanovach achovy zdaroŭja, heta značyć nijakich inšych vidaŭ dapamohi nie isnuje. Kali ž ludzi dla siabie vyrašyli takim čynam, to heta ich prava. Jany biaruć na siabie adkaznaść za vynik takich rodaŭ».
Taksama, pavodle jaho słoŭ, ciapier jość kursy, na jakich rychtujuć da chatnich rodaŭ, ale ich arhanizatary nie atrymlivajuć jakoj-niebudź miedycynskaj licenzii. «Časam na hetych zaniatkach, z majho punktu hledžańnia, jak akušera-hiniekołaha, dajuć nie zusim pravilnaje ŭjaŭleńnie», — ličyć śpiecyjalist. Jon padkreśliŭ, što navat u padručniku amierykanskaha ŭrača ahulnaj praktyki napisana, što možna vieści rody doma, ale na vulicy pavinien stajać reanimabil, razhornuty pad apieracyjnuju. Adnak niemahčyma pastavić taki aŭtamabil kala kožnaha doma.
Pavodle danych miedykaŭ, u minułym hodzie ŭ Biełarusi było 110 tys. rodaŭ, ź jakich 246 — pa-za ścienami miedycynskich ustanoŭ.
