26-ha listapada — dzień narodzinaŭ Uładzimiera Karatkieviča, biełaruskaha piśmieńnika, paeta, dramaturha. Kožnyja ŭhodki słavutaha ziemlaka tradycyjna adznačajucca na jaho małoj radzimie, u Oršy.
Dzień narodzinaŭ piśmieńnika adznačaŭsia ścipła — u adroźnieńnie ad letašnich, 80-ch uhodkaŭ, sioleta data nia «kruhłaja». Śviatočnyja imprezy, jakija prachodzili ŭ Voršy ciaham minułaha tydnia, byli arhanizavanyja supracoŭnikami muzeju Ŭładzimiera Karatkieviča i dziciačaj biblijateki, jakoj nadadziena imia piśmieńnika.
Na tradycyjnaje ŭskładańnie kvietak da pomnika piśmieńniku-ziemlaku pryjšli vučni himnazii №2 — byłoj pieršaj siaredniaj škoły, dzie niekali vučyŭsia Ŭładzimier Karatkievič. Dzieci čytali vieršy, sa svaimi tvorami vystupili i miascovyja litaratary. Pradstaŭnikoŭ haradzkich uładaŭ nie było ŭvohule: ad imia harvykankamu prysutnych vitaŭ tolki dyrektar aršanskaha muzejnaha kompleksu Ŭładzimier Kuzubaŭ.
Z kvietkami da Karatkieviča prychodzili i zvyčajnyja haradžanie, i pradstaŭniki miascovych demakratyčnych siłaŭ, jakija ŭskłali da pomnika vianok ad moładzievaj supołki «Źviaz» i supołki Tavarystva biełaruskaj movy.
Pavodle daŭniaj tradycyi, paśla litaraturnych čytańniaŭ kala pomnika ŭsich achvotnych zaprasili ŭ muzej Uładzimiera Karatkieviča. Jon mieścicca jakraz u tym budynku, dzie niekali była radzilnia, u jakoj budučy piśmieńnik pryjšoŭ u hety śviet. Hetymi dniami muzej prymaje asabliva šmat ekskursantaŭ, jakija jeduć u Voršu z roznych haradoŭ — i školnikaŭ, i studentaŭ, i ludziej stałaha vieku.