Adkazy na pytańni mohuć chavacca i ŭ śniehaviku.
Napeŭna, mnohija b chacieli apynucca na miescy Majkła Duhłasa ŭ pryhodnickim filmie «Hulnia». Siońnia heta mahčyma z dapamohaj prajekta «Enkaŭntar» — sietki aktyŭnych haradskich hulniaŭ.
Kab paŭdzielničać, vam patrebny internet, aŭtamabil i karta miascovaści. Ujavicie, što kampjutarnaja hulnia stała realnaściu. A zamiest Supiermarya pa horadzie biehajecie… vy (tolki zabivać nikoha nie treba).
Šukaŭ dziaŭčynu praz kviest
«Schvatka» — pieršaja na postsavieckaj prastory haradskaja pošukavaja hulnia. Stvaryŭ jaje minčuk Ivan Maślukoŭ u 2001. Mienavita z našaj stalicy «Schvatka» patrapiła ŭ Picier i Maskvu.
Cikava, što stvaralnik hulniaŭ peŭny čas šukaŭ spadarožnicu žyćcia… praz kviest! Pretendentkam prapanoŭvałasia adkazać na pytańni. I tolki samyja kiemlivyja mahli patrapić na novy ŭzrovień — spatkańnie.
Što takoje schvatka? Kamandy-ŭdzielnicy atrymlivajuć zadańni na sajcie. U ich zašyfravanyja miescy ŭ horadzie ci navakolli. Razhadaŭšy miesca i pryjechaŭšy tudy, kamandzie treba znajści «kod». Jon moža być napisany dzie zaŭhodna: u padvale zakinutaha budynka, na drevie, u race — što ŭzbrendzić u hałavu arhanizataram. Zdabyŭšy kod, treba ŭvieści jaho na sajt i atrymać novaje zadańnie. Pieramahaje toj, chto chutčej projdzie ŭsie ŭzroŭni.
Pamycca ŭ vannaj u hramadskim miescy
Isnuje sproščany varyjant — «Kropka». U adroźnieńnie ad «Schvatki», kod na miescy zdabyć nieskładana. Jon znachodzicca na bačnym miescy i nie chavajecca. Takim čynam, hulniu možna prajści, nie vychodziačy z aŭto.
Dla «Kešynhu» vam spatrebicca GPS-navihatar i rydloŭka. Atrymaŭšy kaardynaty miascovaści, udzielniki pavinny adkapać «tajnik» z kodam.
Tvorčyja asoby mohuć pasprabavać siabie ŭ «Fotapalavańni» ci «Videapalavańni». Atrymaŭšy zadańnie na sajcie (a heta moža być słova, cytata, muzyčny ŭryvak), udzielniki prydumlajuć ideju dla fota ci videa, jakoje pavinna adlustroŭvać sutnaść zadańnia. Pieramahaje toj, chto atrymaje najvyšejšyja bały za zdymki. Najbolš dziorzkija fatohrafy vybirajuć «Fotaekstrym». Tut patrabujecca źniać niezvyčajnyja situacyi, jakija časam vychodziać za miežy prystojnaści. Naprykład, sfatahrafavać, jak dziaŭčyna myjecca ŭ vańnie ŭ hramadskim miescy. Albo milicyja kataje čałavieka na kreśle.
Darečy, prablemaŭ z uładami i milicyjaj nikoli nie ŭźnikała, kažuć arhanizatary. Dy i sami milicyjaniery z achvotaj hulajuć. U minułym hodzie razam z DAI była praviedzienaja dabračynnaja hulnia ŭ «Zubraniaci».
«Zamačyć» achviaru
«Mokryja vojny» — heta «kazaki-razbojniki» dla darosłych. Kožny ŭdzielnik źjaŭlajecca achviaraj i palaŭničym adnačasova. Kali ŭdzielnik «zamačyŭ» achviaru, jana addaje svoj žyćciovy kod i vybyvaje z hulni. A palaŭničy ŭvodzić kod na sajcie i atrymlivaje źviestki pra nastupnuju «achviaru». Vyjhraje toj, chto zamočyć usich.
Hulnia pravodzicca pieravažna letam. Ale jość zimovy farmat — «Śniehavyja vojny».
U «Viktarynu» i «Mazhavy šturm» možna hulać u internecie, nie vychodziačy z doma. Jak vynikaje z nazvy, sutnaść hulki — anłajn-adhadvańnie zahadak. Farmat viktaryny padobny da papularnych intelektualnych telešou ala «Chto choča stać miljanieram?» ci «Pole cudaŭ».
Biełarusy dla Sarbony
Siońnia hulniami «Enkaŭntara» zachaplajucca kala 300 tysiač čałaviek pa ŭsim śviecie. U Biełarusi zarehistravana kala 20 tysiač udzielnikaŭ. Hulni prachodziać u 10 haradach našaj krainy. Heta krychu mienš, čym u 2010: adbiŭsia kryzis i rost cenaŭ na bienzin.
Darečy, kali zdaryŭsia kryzis, administratary «Enkaŭntara» pryniali rašeńnie dać 50% źnižku na ŭsie hulni ŭ Biełarusi. Raniej takuju ž źnižku mieli hulcy z Kyrhyzstana.
Cana ŭdziełu ŭ hulni na adnaho čałavieka składaje $3-5. Pałova sumy idzie na pryzy i pačastunki na finišy, pałova — zarobak aŭtaraŭ hulni. Na bujnych i mižnarodnych hulniach košt pavialičvajecca. Ale i maštaby inšyja: dva dni hulni i dziasiatki składanych misij, raskidanych pa vialikaj terytoryi.
U paraŭnańni z tradycyjnymi zachapleńniami moładzi, takoje baŭleńnie času zastajecca najbolš dastupnym. Sa słoŭ arhanizataraŭ, raniej siarod udzielnikaŭ možna było sustreć i biznesoŭcaŭ, i vykładčykaŭ. Zaraz pieravažajuć studenty i siaredni kłas ludziej da 30 hadoŭ.
U hulniach «Enkaŭntara» prymali ŭdzieł viadomyja asoby — Rusłana, «Akijan Elzy», Jaŭhien Hryškaviec, Arciemij Lebiedzieŭ dy inšyja. Siarod biełarusaŭ — intelektuał Aleś Muchin i piśmieńnica Volha Hramyka. Stvaralniki hanaracca, što ich minskaje dvarovaje zachapleńnie pakaryła 23 krainy Jeŭropy. Kiraŭniki Sarbony zaprašali ich ładzić hulni dla svaich studentaŭ. A rasijski MTS pabudavaŭ na ich idejach i z dapamohaj biełaruskich scenarystaŭ i prahramistaŭ medyja-kviest z 2,6 miljonami ŭdzielnikaŭ.
* * *
Prykłady realnych zadańniaŭ:
«Jak kaža haradskaja lehienda savieckich časoŭ, kali vyrašałasia pytańnie ab naźvie hetaha minskaha hatela, adzin čynoŭnik ustaŭ, papraŭlajučy akulary, kašlanuŭ, zapaliŭ i, kinuŭšy na stoł pačak cyharet, skazaŭ: «A što tut dumać?! Voś i nazva!»
Adkaz: hatel «Arbita». Dalej kamandy pryjazdžajuć u «Arbitu» i biaruć u administratara kanviert z zadańniem. U im — zadača na viedańnie Minska:
(Kolkaść stancyj mietro Minska) + (Kolkaść rajonaŭ) — (Kolkaść aniołaŭ na hierbie) / (Hod zasnavańnia Minska) / (Kolkaść płoščaŭ u Minsku) = Numar pakoja
Ci jašče. Zadańni byli zapisanyja na dysku piesień. U adnoj ź ich śpiavałasia pra «miesca, dzie ŭ śvietłym budynku na praśpiekcie jość ziamny šar». Pravilny adkaz — budynak BNTU, pobač ź jakim staić hłobus.
