Aleha Vołčaka dastavili ŭ sud Centralnaha rajona Minska

Jak raniej paviedamlałasia, były śledčy prakuratury, kiraŭnik hramadskaha abjadnańnia «Pravavaja dapamoha nasielnictvu» (Kijeŭ) Aleh Vołčak byŭ zatrymany ŭ Minsku 27 studzienia. Na vulicy da jaho padyšoŭ milicyjanier, paprasiŭ dla pravierki dakumienty i zatrymaŭ pravaabaroncu. Vołčak paśpieŭ paviedamić pa telefonie, što jaho abvinavačvajuć u drobnym chulihanstvie (art. 17.1 Kodeksa ab administracyjnych pravaparušeńniach). Paśla składańnia administracyjnaha pratakoła zatrymanaha dastavili ŭ Centr izalacyi pravaparušalnikaŭ na vulicy Akreścina, dzie jon znachodziŭsia da suda.

Čakałasia, što praces pa administracyjnaj spravie Vołčaka adbudziecca ranicaj, adnak u sud jaho dastavili prykładna ŭ 13.50. Usiu pieršuju pałovu dnia pra los zatrymanaha pravaabaroncy ničoha nie było viadoma. Pavodle słoŭ vidavočcaŭ, Vołčak vyhladaje narmalna.

Jak paviedamili niekatoryja internet-resursy, pravaabaronca byŭ zatrymany pierad pajezdkaj za miažu dla ŭdziełu ŭ mižnarodnym pravaabarončym mierapryjemstvie. Pavodle niekatorych źviestkach, u Vołčaka nibyta płanavałasia sustreča «z hrupaj aficeraŭ-patryjotaŭ» (Vołčak — udzielnik bajavych dziejańniaŭ u Afhanistanie).

Varta adznačyć, što tydzień tamu, 23 studzienia, Aleh Vołčak prezientavaŭ u Minsku spravazdaču «Pravavoj dapamohi nasielnictvu» pa kryminalnaj spravie Alesia Bialackaha — vice-prezidenta Mižnarodnaj fiederacyi pravoŭ čałavieka, asudžanaha ŭ listapadzie 2011 hoda na 4,5 hoda pazbaŭleńnia voli za «ŭtojvańnie dachodaŭ u asabliva bujnym pamiery».

Mižnarodny pravaabarončy prajekt «Absiervatoryja pa abaronie pravaabaroncaŭ» zapatrabavała ad biełaruskich uład nieadkładnaha vyzvaleńnia Aleha Vołčaka.

0

0

0

0

0

0

Siarhiej Pulša, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH