Administracyja mikaševickaha «Hranita» admoviła ŭ rehistracyi pieršasnaj supołcy Biełaruskaha niezaležnaha prafsajuzu. Staršynia BNP Mikałaj Zimin raskazaŭ «NN», što adkaz padpisany načalnikam jurydyčnaha adździeła pradpryjemstva. U im havorycca, što administracyja nie atrymała poŭny pakiet nieabchodnych dla rehistracyi dakumientaŭ.
«Heta adpiska. Pa-pieršaje, dziŭna, što nam adkazaŭ nie hiendyrektar, a načalnik jurydyčnaha adździełu. Pa-druhoje, u tym adkazie nie havorycca, jakich kankretna dakumientaŭ nie chapaje», — padkreślivaje Zimin. Z momantu padačy zajaŭki, tym časam, prajšło try tydni.
Pa słovach staršyni BNP, pieršapačatkova ŭ Łuninieckim rajvykankamie admovilisia rehistravać supołku. Pa toj pryčynie, što paŭnamoctvy vydzielić jurydyčny adras, nieabchodny dla rehistracyi, maje tolki Ministerstva architektury i budaŭnictva, jakoje źjaŭlajecca ŭłaśnikam pradpryjemstva. Mikałaj Zimin dapuskaje, što ź ministerstva mahli hetyja paŭnamoctvy pieraadrasavać niepasredna na «Hranit».
Nahadajem, što naprykancy śniežnia 2011 hoda niekalki socień rabočych RUVP «Hranit» vyjšli z aficyjnaha prafsajuza. Ź ich bolš za Bolš jak 200 čałaviek uvajšli ŭ supołku Biełaruskaha niezaležnaha prafsajuzu harniakoŭ.
