Sankcyi i adnabakovyja rezalucyi ŭ dačynieńni da Biełarusi zavodziać situacyju ŭ tupik, zajaviŭ namieśnik ministra zamiežnych spraŭ Rasii Ryhor Karasin 30 studzienia ŭ Minsku, adkazvajučy na pytańni žurnalistaŭ.
U pryvatnaści, kamientujučy niadaŭniuju rezalucyju pa Biełarusi Parłamienckaj asamblei Savieta Jeŭropy, Karasin padkreśliŭ: «Rasija i jaje dypłamaty zaŭsiody havorać usim našym zachodnim partnioram, što palityka sankcyj zavodzić situacyju ŭ tupik. My prychilniki taho, kab kantakty praciahvalisia, kab usie prablemy vyrašalisia ŭ duchu adkrytaści i transparentnaści. Takoj pazicyi my budziem prytrymlivacca i dalej».
Na dumku Rasii, adznačyŭ Karasin, Biełaruś pavinna być pradstaŭlena na ŭsich forumach i mieć mahčymaść samastojna adstojvać svaju pazicyju.
Adkazvajučy na ŭdakładnialnaje pytańnie, ci aznačaje heta, što Rasija nie bačyć prablem u śfiery vykanańnia pravoŭ čałavieka ŭ Biełarusi, Karasin skazaŭ:
«Vy viedajecie našu pazicyju adnosna padziej 19 śniežnia, my pra heta ščyra i ŭ hołas zajavili. U nas jość pytańni nakont hetaha, ale my ličym, što ŭsie hetyja prablemy pavinny vyrašacca ŭ dyjałohu».
Były pasoł Biełarusi ŭ Rasii Vasil Dałhaloŭ adznačyŭ, što na Zachadzie «da nas prostyja ludzi i biźniesmieny dobra staviacca». «Vy pahladzicie, kolki ŭ nas stvorana SP, — skazaŭ Dałhaloŭ. — Prablema ŭ tym, što nam Jeŭropa sprabuje naviazać svaju pazicyju. Ale ŭ luboj krainie možna znajści niezadavolenych uładaj. Prablemy jość u luboj krainy, a padkreślivać ich, ździekavacca, sprabavać zacisnuć — heta kontrpraduktyŭna».
