Fota Andrei Shavlugo.
Chutka ŭ kinateatry «Rakieta» adčyniajecca kinazała pavyšanaj kamfortnaści i repiertuarnaj jakaści, piša 34mag.net Na druhi pavierch kinateatra pierajechaŭ prajekt Cinemascope – toj, što kruciŭ dla nas razumnaje kino ŭ «Centr-videa» i pa sieradach rabiŭ heta ŭ «Pieramozie». 34mag acaniŭ ramont i pahutaryŭ z hałoŭnymi kinaramantykami Mienska.
«Fatelaŭ pakul niama, – papiaredžvaje Ola Nadolskaja, pałova prajektu Cinemascope. – Na dniach pryviazuć z Horadni». Druhaja pałova prajekta, Hiera Hlik, u hety čas raściahvaje pa kutach užo pryviezienyja fateli-miaški.
Chutka nievialiki pakoj błakitnaha koleru pieratvorycca ŭ kinazału, dzie možna budzie pabačyć rańniaha Kubryka na Blu-ray, Chičkoka ŭ HD ci niamoje savieckaje kino na stužcy 8 mm.Adzin Ramera viedaje, kolki kołaŭ biurakratyčnaha piekła daviałosia prajści arhanizataram.
Prajekt Cinemascope isnuje z 2009 hoda i jość łahičnaj reinkarnacyjaj kinakłubaŭ Mienska 1990-ch. Hiera Hlik pačaŭ zajmacca kinadziejnaściu jašče ŭ toj ramantyčny čas, kali z Maskvy napaŭlehalna pryvozili filmy Antanijoni na kasietach. Ź ciaham času dałučyłasia Ola – i naradziŭsia Cinemascope. Jany ładzili pakazy ŭ kinateatry «Pieramoha» pa sieradach i praciahły čas rabili heta ŭ «Centr-videa». Adnak sioleta ŭ listapadzie kinazału ŭ «Stalicy» začynili z-za nierentabielnaści i stvaryli na jaho miescy zvyšrentabielny zał hulniavych aŭtamataŭ. Nastaŭ čas źmianić miesca dysłakacyi.
Mienski kinavideaprakat prapanavaŭ niekalki placovak, u tym liku samy saŭkovy ź isnych kinateatraŭ – «Rakietu». «Kali my pryjšli siudy i pabačyli zału – štučnyja kvietki, hnomikaŭ i zajčykaŭ na scenie – byŭ šok», – uspaminaje Hiera.Amal vypadkova trapili na druhi pavierch – jon pryznačaŭsia dla viečaryn «Kamu za 60». Spačatku dumali prosta zamianić ściorty babulčynymi abcasami parkiet – adnak minimalnaha ramontu akazałasia niedastatkova.
Prajekt zały raspracavała niejkaja madam ź dziaržarhanizacyi, «Mienskkinavideaprakat» vydatkavaŭ hrošy na ramontnyja pracy. Ekran, akustyka i hukaŭzmacnialniki pryjechali z «Centra-videa». Astatniaje – aparaturu, častku mebli, prajektar – Hiera i Ola nabyvali za ŭłasnyja hrošy. «Na čorny dzień nie zastałosia ničoha», – uśmichajecca Ola. Pry tym, što z pohladu hrošaj Cinemascope – sajd-prajekt dla stvaralnikaŭ. Hiera pracuje ŭ «Mienskkinavideaprakacie», jon adkazny za ŭsiu typahrafiju, Ola – ahladalnikam na rasijskim kinasajcie. Adnak da pytańniaŭ akupnaści jany staviacca spakojna.
…Adnojčy praletarski rajon pieratvorycca ŭ terytoryju art-skvotaŭ i raskvitnieje kulturnickimi ŭstanovami. A pakul ruchavikom źmienaŭ maje zrabicca kinazała ŭ «Rakiecie». Ź idealistyčnych maraŭ – zrabić wi-fi, pastavić aŭtamaty ź ježaj dy napojami, sabrać kinabiblijateku, ładzić abmierkavańni i dyskusijnyja kłuby.U arhanizataraŭ šmat videa-artu – adnak dla jaho treba admysłovaja arhanizacyja prastory. Asablivaści inicyjatyŭnaj dziejnaści ŭ Biełarusi pakul prytarmožvajuć hetyja pracesy. Adnak prahres niepaźbiežny – kab heta zrazumieć, varta naviedać miascovuju prybiralniu, jakaja doŭhi čas była apošnim kancentravanym podycham saŭka. Razrucha, chacia b u prybiralniach, niepaźbiežna źnikaje.
Fišačka 1. Subcitry
Filmy buduć demanstravacca na movie aryhinała z ruskimi subcitrami – heta pryncypovaja pazicyja. Mahčymyja redkija vyklučeńni – kali reliz rasijski. Darečy, subcitry Ola kožny raz pierakładajuć admysłova – u standartnych šmat pamyłak, ad arfahrafičnych da faktyčnych.
Fišačka 2. Farmaty
HD-DVD, Blu-ray. Płanujuć demanstravać filmy sa stužak 8 i 16 mm – naŭrad ci vy adšukajecie takoje na paru socień kiłamietraŭ vakoł.
Fišačka 3. Repiertuar
Adzinyja, chto nie vykarystoŭvaje soty raz dziaržaŭnych zapaśnikaŭ i sam nabyvaje prakatnyja kopii stužak. Repiertuar składajuć, zychodziačy z ułasnaha hustu i taho, što zdolnyja nabyć va ŭładalnikaŭ pravoŭ. Pieršym časam budzie miks z raniej pakazanaha – Venders, Saŭra, Chičkok dy inš. 19 maja z Maskvy pryjedzie ź lekcyjaj kinaznaŭca Viktar Zacepin, vydaviec pieršaj u Rasii knihi pra Stenli Kubryka. Hetym raspačniecca retraśpiektyva rańnich filmaŭ majstra ŭ HD. Budzie šmat avanhardnaha i ekśpierymientalnaha kino, a ŭ nastupnym hodzie płanujecca pakaz stužak hrupoŭki «Zanzibar», prymierkavany da hadaviny«čyrvonaha maja» 1968-ha.
Kinazała ŭ kinateatry «Rakieta»
Pracoŭny zavułak, 3 (st. m. «Praletarskaja»)
Kolkaść miescaŭ: 30–40
Košt kvitkoŭ: 10 000 – 15 000
Pracuje: sierada – niadziela. Vychodnyja – paniadziełak, aŭtorak.
Sieansy: 19:00, 21:00 – budni,
17:00, 19:00, 21:00 – vychodnyja
Sačycie za padziejami na sajcie prajekta Cinemascope.