Viciebski abłasny sud 18 maja adchiliŭ kasacyjnuju skarhu aktyvista Kansiervatyŭna-chryścijanskaj partyi — BNF Siarhieja Kavalenki na prysud suda Pieršamajskaha rajona Viciebska.

27 lutaha sud Pieršamajskaha rajona pad staršynstvam Aleny Žuk pryznaŭ Kavalenke vinavatym va ŭchileńni ad adbyćcia pakarańnia ŭ vyhladzie abmiežavańnia voli (art. 415 KK). Havorka idzie ab pakarańni, vyniesienym apazicyjanieru ŭ mai 2010 hoda za vyviešvańnie bieł-čyrvona-biełaha ściaha na hałoŭnaj navahodniaj jołcy Viciebska, — try hady pazbaŭleńnia voli ŭmoŭna. Kavalenka byŭ zatrymany 19 śniežnia 2011 hoda i z tych časoŭ znachodzicca ŭ źniavoleńni.

Razhlad kasacyjnaj skarhi ŭ abłasnym sudzie pačaŭsia 10 krasavika.
Tady sudovaja kalehija Viciebskaha abłasnoha suda pryniała rašeńnie nakiravać Kavalenku na kompleksnuju psichijatryčnuju ekśpiertyzu va ŭmovach stacyjanara. U vyniku apazicyjanier byŭ nakiravany ŭ RNPC psichičnaha zdaroŭja ŭ Navinkach, dzie amal na praciahu miesiaca pravodzili ekśpiertyzu jaho psichičnaha zdaroŭja.
Ekśpierty pryznali jaho psichična zdarovym.

Ekśpiertyza była pryznačanaja ŭ suviazi z haładoŭkaj, jakuju Kavalenka trymaŭ bolš za dva miesiacy ŭ znak pratestu suprać svajho aryštu i padčas jakoj jon straciŭ amal pałovu ŭłasnaha vahi.

13 krasavika, znachodziačysia ŭ RNPC, Kavalenka haładoŭku spyniŭ. 8 maja, paśla pieravodu z Navinak nazad, u viciebski śledčy izalatar № 2, apazicyjanier adnaviŭ akcyju pratestu.

Napiaredadni siońniašniaha pasiadžeńnia suda, 16 maja, z Kavalenkam sustrakaŭsia advakat. Jak paviedamiła žonka apazicyjaniera Alena Kavalenka,

Siarhiej znoŭ pačaŭ hublać vahu, ciapier jon važyć kala 60 kh.
«Akramia taho, jon zaŭvažaje ŭ siabie prykmiety cukrovaha dyjabietu, jaki moh być vyklikany prymusovym uvodam hlukozy padčas haładoŭki», — raspaviała Alena.

Siońnia ranicaj jana, a taksama stryječny brat Kavalenki i aktyvistka hramadzianskaj kampanii «Jeŭrapiejskaja Biełaruś» Alena Siemienčukova byli zatrymanyja za toje, što zrabili na asfalcie pierad budynkam abłasnoha suda nadpis «Svabodu Siarhieju Kavalenku!».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?