U vieraśni hetaha hoda buduć zapuščanyja try novyja stancyi mietro: «Hrušaŭka», «Michałova» i «Piatroŭščyna». Błohier Alaksandr Łyčaŭka raskazvaje i pakazvaje, u jakim stanie stancyi ciapier. A taksama sprabuje rastłumačyć, kudy nam treba budzie ŭvachodzić i adkul vychodzić.

Stancyja «Hrušaŭka»
skryžavańnie pr-ta Dziaržynskaha — vuł. Ščorsa

Heta dvuchpralotnaja kałonnaja stancyja, u dyzajnie jakoj buduć pieravažać pryrodnyja matyvy. Mastaki ŭžyvajuć słovazłučeńnie «poźniaje leta»: maŭlaŭ, pieravažać budzie załacista-zialonaja palitra. Na rendary budučaha interjeru možna bačyć žoŭtyja koły na stoli (krony drevaŭ) i chaatyčna raźmieščanyja ciomnyja trykutniki (apałaje liście) na padłozie.

Pakul na stancyi vykładzienaje padłohavaje pakryćcio i vykananaje azdableńnie nižniaj častki ścien. U stancyi budzie tolki adzin viestybiul: miarkujecca, što z boku druha kraju stancyi pasažyrapatok budzie vielmi słabym, voś i nie stali rabić tam vychad.

Vychady buduć zroblenyja va ŭsie čatyry baki ad skryžavańnia praśpiekta Dziaržynskaha i Ščorsa. Druhaja hrupa vychadaŭ raźmiaściłasia b bližej da praśpiekta Žukava (kali b była pabudavanaja).

Darečy, mietrabudaŭnikam pa darozie ad «Hrušaŭki» da nastupnaj stancyi «Michałova» sustrełasia padziemnaja rečka, jakuju pakul nie ŭdałosia kančatkova pieramahčy. Sa stoli pastajanna kapaje, a ŭ pierahonie zmantavanyja dvoje masiŭnych dźviarej vieličynioj va ŭvieś prajom. Mahčyma, kali raptam chłynie patok vady, možna budzie adsiekčy burnuju padziemnuju rečku ad astatniaha mietro.

Stancyja «Michałova»
skryžavańnie pr-ta Dziaržynskaha i vulic Hurskaha i Umanskaj

Tut prajektavalniki čamuści taksama nie ŭhledzieli vialikaha pasažyrapatoku. Tamu praduhledzieli adzin uvachodny viestybiul, jaki raźmieścicca ŭ siaredzinie stancyi, — u pierśpiektyvie takaja kanstrukcyja stanie asnovaj dla raspracoŭki typavych stancyj mietro.

Leśvicy buduć spuskacca na płatformu ŭ jaje centralnaj častcy. Takoje rašeńnie vykarystanaje na «Pieršamajskaj», tolki tam sami płatformy raźmieščany pa bakach ad šlachoŭ, a «Michałova» budzie stancyjaj bolš zvykłaj kanfihuracyi: kałonnaja trochpralotnaja. Pieravažnaja tema afarmleńnia — «chałodny zachod», abo «zimovy zachod». Miarkujučy pa malunkach, niešta barvova-karyčnievaje budzie atačać sierabrysta-šeruju płatformu.

Vychadaŭ na pavierchniu praduhledžana try. Dva — amal nasuprać kramy «Na Umanskaj» pa abodva baki ad praśpiekta. Treci — da handlovaha centra Globo. Vychad u bok Globo pakul u začatkavym stanie.

Na hetaj stancyi — najmienšy pracent vykananych rabot: nad samoj płatformaj jašče nie skončanaje pierakryćcie, rejki nie ŭsiudy zamacavanyja bietonnaj ściažkaj, a azdableńnie pradstaŭlenaje častkova pakładzienymi plitami padłohi.

Stancyja «Piatroŭščyna»
skryžavańnie pr-ta Dziaržynskaha i vulic Hołubieva i Siamaški

Navat staražyły zabylisia, dzie mienavita tut prachodziŭ praśpiekt: nastolki ŭsio pierakapana i pieraharodžana. Stancyja atrymajecca tradycyjnaj adnasklapienistaj, a ŭ interjery budzie ŭvasoblenaja tema zimovaj zornaj nočy.

Na hetaj stancyi praduhledžana bolš za ŭsio vychadaŭ. Dva ź ich buduć vyvodzić pasažyraŭ da «Makdonałdsa» i novych damoŭ, jašče dva — da kinateatra «Biareście» i HC «Kirmaš». Adzin — da mieduniviersiteta, adzin — da ofisnych i zabaŭlalnych budynkaŭ pa druhi bok vulicy Siamaški.

I jašče try — nasuprać vielizarnaha budynka 500-ha filijała «Biełarusbanka». Pry hetym dva ź ich buduć pa cotnym baku praśpiekta Dziaržynskaha, akurat niedaloka ad novych damoŭ, a treci — kala samaha banka. Uładkavany jon budzie chitra: miarkujučy pa ŭsim, hety vychad abstalujuć hetak ža, jak vychad sa stancyi «Traktarny zavod» na Bulvar Traktarabudaŭnikoŭ. Heta značyć, na adnym uzroŭni z pavierchniaj, bieź leśvicy. Leśvica, zrešty, budzie, tolki spuskajecca jana nie ŭ sam padziemny pierachod, a da ŭvachodu ŭ jaho.

Stancyja «Malinaŭka»

Viaducca raboty pa budaŭnictvie trochpralotnaj kałonnaj stancyi «Malinaŭka», jakaja maje być adkrytaja ŭ 2013 hodzie. Raźmieścicca jana na skryžavańni pr-ta Dziaržynskaha i vuł. Jasienina, a ŭ azdableńni buduć pieravažać zialonyja i śvietła-fistaškavyja tony. Stol pafarbujuć u błakitny koler — atrymajecca taki sabie «letni sad».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?