Raźvitańnie ŭ Breście ź viełahonščycaj Palinaj Žuk adbudziecca nie 25 maja, jak płanavałasia raniej, a na dzień paźniej — 26 maja.
Pra heta paviedamiła BiełaPAN dziaržaŭny trenier pa spartyŭnym reziervie Ministerstva sportu i turyzmu Natalla Mielech, jakaja ŭvachodzić u hrupu pa arhanizacyi žałobnych mierapryjemstvaŭ.

«Heta źviazana z tym, što afarmleńnie nieabchodnych dakumientaŭ u Tule, adkul pavinny dastavić na aŭtamašynie cieła spartsmienki, zajmaje bolš času, a taksama z tym, što da suboty paśpiejuć pryjechać jaje svajaki i siabry, jakija žyvuć nie ŭ Breście «, — dapoŭniła Mielech.

Pavodle jaje słoŭ, 26 maja z 11.00 da 13.00 u Dziciača-junackaj spartyŭnaj škole (DIUSŠ) № 2 pa viełasporcie adbudziecca hramadzianskaja panichida. Žuk budzie pachavana na mohiłkach «Płoska» ŭ abłasnym centry.

Jak adznačyła Mielech, Palina Žuk, majstar sportu, člen nacyjanalnaj zbornaj kamandy Biełarusi pa viełasporcie, vučyłasia na druhim kursie Biełaruskaha dziaržaŭnaha ŭniviersiteta fizičnaj kultury na dzionnaj formie navučańnia. Jana pačała zajmacca viełasportam bolš jak 10 hadoŭ tamu ŭ DIUSŠ № 2, zatym vučyłasia i treniravałasia ŭ Bresckim abłasnym vučyliščy alimpijskaha reziervu, respublikanskim vučyliščy alimpijskaha reziervu.

Palina Žuk — unučka dvuch viełasipiedystaŭ. Jaje dziadula — Siarhiej Rabčuk — majstar sportu SSSR, zasłužany trenier Biełarusi, babula — Maryja Hruzdava — taksama majstar sportu SSSR pa viełasporcie.

22 maja Žuk atrymała čerapna-mazhavuju traŭmu na mižnarodnych spabornictvach «Vialiki pryz Tuły». Spartsmienka ŭdaryłasia hałavoj ab bietonnaje pakryćcio treka. Paciarpiełuju dastavili ŭ miascovuju balnicu. Tam joj zrabili apieracyju, da jakoj byli pryciahnuty śpiecyjalisty NDI chutkaj dapamohi imia Sklifasoŭskaha i vajennaha kliničnaha špitala imia Burdenki. Na nastupny dzień spartsmienka pamierła.

16 červienia Palinie Žuk spoŭniŭsia b 21 hod. U Breście žyvuć jaje maci, dziadula i babula.

Клас
0
Панылы сорам
0
Ха-ха
0
Ого
0
Сумна
0
Абуральна
0