U subotu 26 traŭnia ŭ Lublinie (Polšča) vystupić biełaruskaja śpiavačka Taćciana Biełanohaja.
Pra heta paviedamlaje štomiesiačny kulturny daviednik horada Lublina ZOOM. Pieršaja častka kancerta pad nazvaj «Noty narodaŭ» raspačniecca, a 19 hadzinie na Litoŭskaj płoščy i adbudziecca ŭ ramkach prahramy «Šmakulturny Lublin». Ułady horada na praciahu apošnich hadoŭ robiać asablivy nacisk na šmatnacyjanalnaść i polikanfiesijnaść Lublina, sprabujučy papularyzavać turystyčny brend Lublina, jak horada sa šmatkulturnaj histaryčnaj tradycyjaj.

Akramia Taćciany Biełanohaj, jakaja pavinna raspačać kancert, vystupić moładzievy chor pravasłaŭnaha sabora ź Biełastoka, hurty, jakija vykonvajuć cyhanskuju, aryjentalnuju, ukrainskuju i bałkanskuju muzyku.

Taćciana Biełanohaja praciahnie svaju kancertnuju prahramu ŭ Lublinie ŭ paniadziełak 28 traŭnia, dzie vystupić u restaranie «Chades» na vulicy Hrodzkaj.

Biełaruskaje asiarodździe Lublina prychilna adhukajecca na zaprašeńnie Taćciany Biełanohaj ŭ Lublin. Ułady horada pryniali da ŭvahi minułahodni skandał, źviazany z zaprašeńniem hurta «Rocker Jocker», jaki, vykonvajučy ŭ miežach prahramy «Noč kultury» pieśni na rasiejskaj movie ŭ styli błatnoha turemnaha falkłoru, šakavaŭ biełaruskich słuchačoŭ i vyklikaŭ pratestnuju reakcyju. Palaki, adnak, pa-raniejšamu hladziać na biełaruskuju kulturu praz pryzmu rasiejskaj, pišučy imia biełaruskaj śpiavački raz «Tatsiana», a raz uvohule «Tatiana». Niahledziačy na namahańni, Lublin, na žal, pakul nie paśpieŭ adpaviedna zanatavać biełaruskuju prysutnaść u horadzie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?