Aktyvista hramadzianskaj kampanii «Jeŭrapiejskaja Biełaruś» Andreja Moŭčana, žorstka źbitaha supracoŭnikami milicyi ŭ Minsku 19 maja, siońnia paśla abiedu vypisvajuć sa staličnaj balnicy chutkaj dapamohi.

«Siońnia na abchodzie mnie paviedamili, što vypisvajuć. Pavodle słoŭ urača, dalejšaje lačeńnie možna prachodzić u paliklinicy», — paviedamiŭ Moŭčan.

Pavodle słoŭ aktyvista, jamu aficyjna ŭstanoŭleny dyjahnaz «čerapna-mazhavaja traŭma». «Budu źviartacca ŭ palikliniku, pahladzim, što skažuć tam», — skazaŭ Andrej.

Nahadajem, pieršapačatkova ŭračy zafiksavali ŭ źbitaha nie tolki čerapna-mazhavuju traŭmu, ale i pierałom skivicy. Adnak 23 maja doktar skazaŭ Moŭčanu, što pierałom skivicy ŭ jaho — stary. Sam Andrej śćviardžaje, što nijakaha pierałomu skivicy raniej u jaho nie było.

***

Aktyvist «Jeŭrapiejskaj Biełarusi» byŭ zatrymany milicyjaj 19 maja kala ŭniviersama «Pieršamajski». U znak salidarnaści sa źniavolenym viciebskim apazicyjanieram Siarhiejem Kavalenkam jon razharnuŭ bieł-čyrvona-bieły ściah, i praź niekalki chvilin da jaho padjechała mašyna z supracoŭnikami milicyi. Paśla taho jak Moŭčan pacikaviŭsia, za što jaho zatrymlivajuć, supracoŭniki milicyi pačali jaho źbivać. Pavodle infarmacyi śviedak, Andreja źbivali i na vulicy, i ŭ mašynie — ab hetym jon paśpieŭ paviedamić pa telefonie svajoj siastry, kali znachodziŭsia ŭ adździaleńni milicyi.

U adździaleńni milicyi siastry paviedamili, što ŭ dačynieńni da zatrymanaha źbirajucca raspačynać kryminalnuju spravu za źniavahu prezidenta i źbivańnie supracoŭnika milicyi pry vykanańni.

Apošni raz pradstaŭnik milicyi razmaŭlaŭ z Moŭčanam pa telefonie 23 maja. Jon cikaviŭsia miescaznachodžańniem aktyvista i abiacaŭ pryjechać da jaho dla hutarki, ale tak i nie naviedaŭ balnicu.

Incydent sa źbivańniem Moŭčana nie kamientujuć ni ŭ MUS, ni ŭ HUUS Minharvykankama.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?