Prahrama raźvićcia AAN (PRAAN) u Respublicy Biełaruś adchilaje infarmacyju pra toje, što film «Vyšej za nieba» źviedaŭ cenzuru.

«Zajavy, jakija raspaŭsiudžvaje scenaryst filma „Vyšej za nieba“ Andrej Kurejčyk u ŚMI, pra nibyta isnuju cenzuru filma i pra ŭjaŭnyja parušeńni adnosna da jaho z boku PRAAN nie adpaviadajuć sapraŭdnaści», — skazana ŭ zajavie, raspaŭsiudžanaj 11 červienia pres-słužbaj PRAAN.

U dakumiencie padkreślivajecca: zamoŭcam i vyklučnym pravaŭładalnikam filma źjaŭlajecca PRAAN. «U suviazi sa źjaŭleńniem u internecie videamateryjałaŭ kinaprajekta „Vyšej za nieba“ PRAAN zajaŭlaje, što viersija filma, jakaja raspaŭsiudžvajecca ŭ internecie, stvorana na asnovie niezakonna prysvojenych materyjałaŭ i nie adpaviadaje zaćvierdžanamu scenaryju», — havorycca ŭ zajavie.

«PRAAN naležać vyklučnyja pravy na ŭsie materyjały kinaprajekta, uklučajučy scenaryj. Usie materyjały kinaprajekta abaronieny mižnarodnym pravam intelektualnaj ułasnaści.
Zhodna z kantraktam, zaklučanym PRAAN z Andrejem Kurejčykam, Kurejčyk uziaŭ abaviazak napisać scenaryj šmatsieryjnaha filma ab praduchileńni dyskryminacyi ludziej, jakija žyvuć ź VIČ, u adpaviednaści z patrabavańniami, vyłučanymi PRAAN. U vyniku byŭ napisany scenaryj mienavita sieryjała, a nie poŭnamietražnaha filma. Kurejčyk nie mieŭ prava rabić kopii i niejak vykarystoŭvać źniaty materyjał i parušyŭ hetym pravy intelektualnaj ułasnaści PRAAN. Źviartajem vašu ŭvahu, što ŭsie abaviazacielstvy pa kantrakcie z boku PRAAN byli vykanany ŭ poŭnym abjomie (scenarystu vypłačany hanarar)», — padkreślivajuć u PRAAN.

Jak raniej paviedamlaŭ BiełaPAN, u kancy minułaha tydnia aŭtarskaja hrupa filma «Vyšej za nieba» publična zajaviła pra svaju niedatyčnaść da źjaŭleńnia ŭ internecie rabočaj viersii karciny.

«Aŭtarskaja hrupa da hetaha fakta dačynieńnia nie maje, — havaryłasia ŭ zajavie. — My škadujem, što ŭ sietku trapiła nie finalnaja viersija filma, a tolki etap pracy nad im. Nam ciažka mierkavać, chto moža stajać za hetaj publikacyjaj, tamu što heta kopija była na rukach u vialikaj kolkaści ludziej ź liku tvorčaj hrupy, akcioraŭ, žurnalistaŭ, krytykaŭ i fiestyvalnych mieniedžaraŭ».

Aŭtary zajavy padkreślivali, što nie ŭchvalajuć takich dziejańniaŭ, ale pry hetym nie majuć namieru «pieraškadžać raspaŭsiudžańniu filma ŭ sietcy».

«My spadziajemsia, što i PRAAN nie vybiera šlach źniščeńnia mastackaha tvora, zadušeńnia tvorčaści i represij suprać tvorčych ludziej, što, viadoma, pryviało b da kančatkovaj palityzacyi prajekta «Vyšej za nieba», — zajavili stvaralniki filma. Na ich dumku, «situacyja ź filmam „Vyšej za nieba“ była štučna zaviedziena ŭ tupik asobnymi supracoŭnikami Prahramy raźvićcia AAN u Biełarusi».

Jašče raniej, 26 krasavika, zdymačnaja hrupa sieryjała «Vyšej za nieba» raspaŭsiudziła videazvarot, u jakim prasiła PRAAN dazvolić pakazać hledačam poŭnamietražnuju viersiju filma.

Praca nad sieryjałam zaviaršyłasia zimoj, paśla čaho zdymačnaja hrupa samastojna zmantavała poŭnamietražnuju viersiju filma, jakaja, na pohlad kiniematahrafistaŭ, «adlustroŭvaje mastackuju i estetyčnuju kancepcyju scenarysta i režysiora».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?