Tak pakul vyhladaje pieršy biełaruski holf-kłub.

Tak pakul vyhladaje pieršy biełaruski holf-kłub.

«Notynhiem»

«Notynhiem»

«Hrynvič»

«Hrynvič»

Na vydzielenaj płoščy pabudujuć i «Zialony Bor», i «Hrynvič», i «Notynhiem».

Na vydzielenaj płoščy pabudujuć i «Zialony Bor», i «Hrynvič», i «Notynhiem».

Prastora na ŭschod ad Minska doŭhi čas zastavałasia pustoj plamaj na mapie. Pakul usio astatniaje zaMKADdzie zabudoŭvałasia katedžnymi pasiołkami ci staličnymi mikrarajonami, tut stajała hłybokaja cišynia. Dva zakaźniki, stary aeraport Lipki, tankavy palihon dy chaatyčna raskidanyja žyllovyja kaapieratyvy — voś i ŭsio ciapierašniaje bahaćcie hetaj častki prystaličča.

Adnak łasy kavałak ziamli nie moh doŭha zastavacca pustym. I voś niekalkimi ŭkazami jaho elehantna padzialili na troch inviestaraŭ, biez aŭkcyjonaŭ i inšych farmalnaściej. Prava pabudavać rajony «Hrynvič», «Notynhiem» i «Zialony Bor» atrymali nievypadkovyja ludzi. Chto jany?

Pasiołak arystakrataŭ

Ćmianaja historyja budaŭnictva holf-kłuba pačałasia ŭ 2007.
Tady Alaksandr Łukašenka vydaŭ ukaz, jaki harantavaŭ sumiesnamu rasijska-biełaruskamu TAA «Holf-kłub» raznastajnyja lhoty. Kampanija atrymlivała ziamielnyja ŭčastki biez aŭkcyjonu, mahła abirać pastaŭščykoŭ i padradčykaŭ biez praviadzieńnia tarhoŭ, pravodzić budaŭnictva pa narmatyvach Rasii i ES i hetak dalej. Darečy, jašče dva punkty ŭkaza byli schavanyja hryfam «dla słužbovaha karystańnia». Košt budaŭnictva aceńvaŭsia ŭ $125 miljonaŭ.

Prajekt stvaraŭsia anhlijskimi architektarami, najlepšymi śpiecyjalistami ŭ śfiery holf-budaŭnictva. Darečy, u 2007 biełarusy jeździli na ekskursiju ŭ holf-kłub u padmaskoŭnym Nachabinie. Admietna, što hety elitny kłub naležyć Ministerstvu zamiežnych spraŭ Rasii.

Holf-kłub na doŭhi čas źnik z navinnych stužak, pakul u kancy 2011 nie było ŭračysta abjaŭlena — pieršaje maleńkaje pole hatovaje dla hulniaŭ.
Śpiecyjalisty tady paśmiajalisia: chto adkryvaje pole poźniaj vosieńniu? A ŭ mai 2012 holf-kłub trapiŭ u zvodki zdareńniaŭ — na miescy budaŭnictva znajšli bajavuju minu časoŭ Vialikaj Ajčynnaj vajny.

Tym časam zabudoŭščyk vyrašyŭ nazvać svoj rajon «Hrynvič» — jak anhlijski horad. U im budzie 66 katedžaŭ, hatel, restaran, akademija holfa i niekalki kramaŭ.

Karespandent «NN» dabraŭsia da miesca budaŭnictva holf-kłuba, kab pahladzieć na svaje vočy, jak viaducca pracy. Šłahbaŭm, mietaličnyja varoty, niekalki pastoŭ achovy z sabakami — akazvajecca, voś tak ścierahuć paŭpustuju placoŭku.
Na pytańnie, ci prymaje holf-pole hulcoŭ, achoŭniki doŭha rahočuć i apisvajuć situacyju niecenzurna: «F...nia! Pakazucha, a nie pole!». A voś siarod budučych ułaśnikaŭ katedžaŭ jany ŭžo nibyta bačyli viadomych ludziej.

U ofisie «Holf-kłuba» paćviardžajuć — prodaž učastkaŭ idzie aktyŭna. Užo znajšli svaich haspadaroŭ 18 z 40 katedžaŭ. Praŭda, nivodzin dom jašče nie pabudavany. U adroźnieńnie ad susiedniaha «Notynhiema», u «Hrynvičy» buduć tolki katedžy koštam ad $250 tysiač. Varta ŭličvać, što klijent addaść hrošy niepasredna za dom, a vykuplać ziamlu pa kadastravym košcie daviadziecca asobna.

Anhlijski rajon pad jeŭrapiejskimi sankcyjami

Jašče adzin prajekt z anhlijskaj nazvaj, «Notynhiem», źjaviŭsia ŭ 2008, paśla praviedzienaha padčas libieralizacyi Biełaruskaha inviestycyjnaha foruma ŭ Łondanie. Notynhiem — anhlijski pabracim Minska. Abjom inviestycyj aceńvaŭsia ŭ hihanckija $750-800 miljonaŭ.

Za hety košt na terytoryi 290 hiektaraŭ musiła paŭstać 850 tysiač kvadratnych mietraŭ žylla dla 21 tysiačy čałaviek.
Zhodna z prajektam, vyšynia šmatkvaternych damoŭ nie pieravyšaje piać pavierchaŭ. Dla amataraŭ indyvidualnaha žylla było zapłanavana 150 katedžaŭ. Davoli simpatyčny architekturny prajekt byŭ raspracavany «Biełarchprajektam» pad kiraŭnictvam Alaksandra Kanavalenki.

Prava budaŭnictva atrymała kampanija «JuniviestBudInviest», padraździaleńnie kampanii «Juni-viest-M» rasijskaha miljaniera Anatola Tarnaŭskaha. Jahonuju dziejnaść u Biełarusi možna apisać niekalkimi faktami: zajmaŭsia prodažam naftapraduktaŭ, spansavaŭ Prezidencki spartyŭny kłub Dźmitryja Łukašenki, u kampanii pracavała Dźmitryjeva žonka Hanna. U vyniku trapiŭ pad sankcyi Jeŭrasajuza.

Ci to mienavita praz sankcyi, ci to praz adsutnaść svabodnych hrošaj (a «JuniviestBudInviest» praciahvaje budavać kompleks «Kaskad» u centry Minska), raboty ruchajucca nadzvyčaj marudna. Prajekt pačaŭ realizoŭvacca jašče ŭ 2008, ale praz čatyry hady iduć tolki jašče «prajektnyja pracy pa budaŭnictvie inžyniernych kamunikacyj».

Druhi «Zialony Bor»

Nie moh zastacca biez svajho pasiołka i haspadar «Trajpła» Juryj Čyž. Jamu vydzielili miesca kala pasiołka «Kałodziščy-2» i daručyli pabudavać faktyčna novy horad na 160 tysiač žycharoŭ i 60 tysiač pracoŭnych miescaŭ.
Miljanier akazaŭsia adzinym, chto sutyknuŭsia z pratestami miascovych žycharoŭ. Im kateharyčna nie spadabałasia ideja čynoŭnikaŭ. Tym bolš što dla jaje realizacyi daviadziecca parušyć šerah zakonaŭ i normaŭ. Naprykład, prakłaści čyhunku praz zakaźnik «Ścikleva», vysiekčy les dla budaŭnictva TEC. Aproč taho, chutkasnaja mahistral, jakaja źviaža stalicu, try elitnyja rajony i aeraport «Minsk-2», projdzie pa haražnym kaapieratyvie, tamu kala 800 haražoŭ daviadziecca puścić pad znos. Ludzi sabrali 1500 podpisaŭ i čakajuć reakcyi ad čynoŭnikaŭ.

Prajekt byŭ prezientavany zusim niadaŭna, tamu kazać pra košt nieruchomaści ŭ rajonie Juryja Čyža pakul što jašče rana.

Nazva «Zialony Bor» užo pradstaŭlena na mapie Minska. Adnajmienny ekałahičny pasiołak pabudavała kampanija «A-100». Jaje kiraŭnik, biznesmien Alaksandr Centar, sprabavaŭ adstajać najmieńnie, jakoje ŭžo stała brendam, i navat zapatentavać jaho. Adnak jahony hołas tak i nie byŭ pačuty.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?