KUP «Minskaja spadčyna» ŭ 2014 hodzie płanuje prystupić da stvareńnia historyka-architekturnaha kompleksu «Minskaje zamčyšča». Pra heta paviedamiŭ dyrektar pradpryjemstva Pavieł Šykuniec.

Prajektnaja dakumientacyja raspracavanaja, uzhodnienaja, prajšła ekśpiertyzu. Narmatyŭny termin budaŭnictva składaje 32 miesiacy. Prajekt praduhledžvaje stvareńnie archieałahičnaha muzieja, muzieja historyi horada, adnaŭleńnie mastavych, krapasnych ścien, elemientaŭ raniejšych kamunikacyj. Tut buduć vykarystoŭvacca interaktyŭnyja technałohii.

«Asnoŭnaja zadača kompleksu — kab minčuki viedali i lubili historyju horada. Takoha centra aśviety ŭ histaryčnym centry Minska nie chapaje, i jaho treba stvaryć. Jašče tam my chočam pradstavić makiet adnoj ź pieršych pravasłaŭnych cerkvaŭ, što isnavała ŭ Minsku — pomnika, jaki niezvarotna stračany», — adznačyŭ Pavieł Šykuniec.

Kompleks raźmieścicca na płoščy amal 5 ha ŭ miežach raki Śvisłač — praśpiekta Pieramožcaŭ — vulicy Bahdanoviča — stancyi mietro «Niamiha» — placoŭki kala Pałaca sportu. Minskaje zamčyšča budzie składacca z troch častak. Pieršaja — padziemnaja zała-amfiteatr na 240 miescaŭ z abchodnymi halerejami i ekspazicyjaj kaštoŭnych archieałahičnych znachodak. Druhaja častka, interaktyŭnaja, budzie źmiaščać muziejnyja ekspanaty ŭ naturalnuju vieličyniu. Treciaja častka kompleksu — Nižni rynak. Tut źjaviacca handlovyja šerahi, adkrytyja kramy z naviesami i paviljon pad tentam «Teatr-bałahan», dzie zmohuć vystupać artysty roznaha žanru.

Minskaje zamčyšča budzie źviazana mostam praź Śvisłač z Trajeckim pradmieściem, što stvoryć piešachodnyja suviazi dla vyhody haradžan i haściej stalicy.

U hramadstvie prajekt historyka-architekturnaha kompleksu «Minskaje zamčyšča» vyklikaŭ nieadnaznačnuju reakcyju. Byli publikacyi ŭ internecie, što jon ihnaruje łandšaft i źjaŭlajecca psieŭdahistaryčnym, bo niama dakładnaj infarmacyi pra sapraŭdnaje abličča horada XII stahodździa. U adkaz na heta Pavieł Šykuniec zaŭvažyŭ, što Minskaje zamčyšča treba ŭsprymać jak muziejefikacyju.

«Uznavić zamčyšča ŭ niejkaj adnoj histaryčnaj prasłojcy nielha, inakš my zabudziem inšyja histaryčnyja epochi. Tamu my pryniali kancepcyju interaktyŭnaha pakazu ŭsioj histaryčnaj spadčyny, jakaja jość i padniataja šlacham archieałahičnych, histaryčnych pošukaŭ. Kab heta pakazać, treba stvaryć umovy, anturaž», — skazaŭ kiraŭnik «Minskaj spadčyny».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?