Jak paviedamiŭ u razmovie ź Bild am Sonntag (niadzielnym dadatkam niamieckaha vydańnia Bild) presavy sakratar MUS Niamieččyny, afera z padrychtoŭkaj biełaruskich siłavikoŭ niamieckimi palicyjantami praciahvałasia nie da 2011 hodu, jak paviedamlałasia raniej, a da viasny 2012. Mienavita ŭ hety čas u Miensku z adpaviednaj misijaj znachodziŭsia adkazny čynoŭnik niamieckaj pamiežnaj palicyi.
Raniej Bild i inšyja niamieckija ŚMI pisali, što siłavyja viedamstvy FRH zajmalisia padrychtoŭkaj biełaruskich kadraŭ u peryjad pamiž 2008 i 2011 hadami. U pryvatnaści, paviedamlałasia, što treninhi na terytoryi Niamieččyny prachodzili kala sta supracoŭnikaŭ dziaržaŭnych strukturaŭ Biełarusi.
Biełarusy prysutničali ŭ jakaści naziralnikaŭ na razhonie niamieckich antyjadziernych demanstracyjaŭ, dzie tamtejšyja palicyjanty ŭžyvali dubinki, vadamioty i ślezaciečny haz. Taksama niamieckija palicyjanty praviali padrychtoŭku 400 biełaruskich pamiežnikaŭ, pradstaŭnikoŭ kiraŭnictva milicyi i kryminalistaŭ na terytoryi Biełarusi.
U Bundestahu čakajuć tłumačeńnia adnosna hetaj afery ad kiraŭnictva niamieckaha MUS. Pra heta zajaviŭ śpikier sacyjał-demakratyčnaj parlamenckaj frakcyi Michael Hartman.Pavodle jahonych słovaŭ, uvieś hety čas vyšejšy zakanadaŭčy orhan krainy nia byŭ prainfarmavany pra supracu pamiž niamieckimi i biełaruskimi siłavikami naležnym čynam.
Treba adznačyć, što pieršymi, chto zabiŭ tryvohu adnosna supracy byli niamieckija levyja na čale ź lideram partyi Hreharam Hizi. Letaś jon nakiravaŭ admysłovy zapyt ŭ federalny ŭrad, dzie nadaŭ hałoŭnuju ŭvahu padziejam 19 śniežnia 2010 i paprasiŭ raśśledavać, ci mieła dačynieńnie da padaŭleńnia tych masavych akcyjaŭ pratestu supraca pamiž asobymi farmavańniami niamieckaj palicyi i biełaruskim AMAPam.
