Pamior dramaturh i scenaryst Aleś Pietraškievič, aŭtar pjesy «Napisanaje zastajecca» i suaŭtar scenara sieryjała «Čas vybraŭ nas».
Raźvitańnie prajšło ŭ zale cyrymonij lečkamisii 26 žniŭnia. Pra heta sa spasyłkaj na Siarhieja Paniźnika paviedamiŭ u svaim dziońniku Alaksandr Fiaduta.
Aleś (Alaksandr) Pietraškievič naradziŭsia 1 maja 1930 h. u vioscy Piarevałačnia Tałačynskaha rajona Viciebskaj vobłaści. Aŭtar scenaroŭ mastackich i dakumientalnych filmaŭ. Kandydat histaryčnych navuk (1967), zasłužany rabotnik kultury Biełarusi (1975), łaŭreat Dziaržaŭnaj premii Biełarusi (1976) za ŭdzieł u padrychtoŭcy i vydańni Biełaruskaj Savieckaj Encykłapiedyi.
Usie hady cisku na Našu Nivu jon byŭ padpisčykam haziety i zastavaŭsia im da apošnich dzion.
* * *
Pra Alesia Pietraškieviča piša Anatol Sidarevič
Siońnia ludzi raźvitalisia z Alesiem Pietraškievičam.
Treba budzie pračytać miemuary Alesia Lavonaviča. Ludzi, jakija čytali, raili pačytać ich i mnie.
Jahonyja histaryčnyja dramy nie tak dla pastanovak, jak dla čytańnia. Zrešty, čamu b i nie pastavić ich? Treba tolki, kab na Pietraškieviča znajšoŭsia svoj Mikałaj Pinihin. Zdoleŭ ža Pinihin z amal niesceničnych «Tutejšych» zrabić teatralny šedeŭr…
Tak i chočacca napisać pra toj vydatny akciorski ansambl. I sa skruchaj uzdychnuć: niama ŭžo ni Jury Aviarjanava, ni Vałodzi
I tut. Adzin za adnym adychodziać encykłapiedysty. Vital Skałaban, Janka Sałamievič… Voś i Aleś Pietraškievič padaŭsia za imi.
Aleś Lavonavič vielmi chacieŭ, kab vyjšaŭ encykłapiedyčny daviednik «Biełaruskaja Narodnaja Respublika». Jon daŭ mnie metadyčki dla redaktaraŭ i — Božuchna! — słoŭnik Encykłapiedyi historyi Biełarusi. Toj, nadrukavany ratapryncie ŭ 1989 h., ź jakoha i pačałasia praca nad EHB. Słoŭnik — jak uzor, padkazka dla rubrykacyi artykułaŭ budučaha daviednika «BNR».
Pamiataju i tuju apošniuju našu razmovu. Bo pierad hetym Aleś Lavonavič apisaŭ (zdajecca, u «Narodnaj voli»), jak jon lažaŭ u lečkamisii i jak razyhraŭ dy vyklikaŭ na ščyraść adnaho supałatnika z histpartčykaŭ. Mianie ŭ toj publikacyi raśśmiašyŭ mienavita rozyhryš. Usio ž treba choć trochi być teatralnym čałaviekam, kab zrabić takoje.I viedać psichałohiju balšavickich mastadontaŭ. U razmovie sa mnoju Aleś Lavonavič dadaŭ jašče niekatoryja detali.
Voś tak, paśmiajaŭšysia i z aptymistyčnym nastrojem, my raźvitalisia da nastupnaj sustrečy… Dy nie sustrelisia, bo Alesia Lavonaviča zvaliła strašnaja chvaroba. Mabyć, sustreniemsia TAM.
A encyklapedyčny daviednik «BNR», mabyć, nikomu, aproč Alesia Pietraškieiča, i nie byŭ patrebny. Nie patrebny i ciapier. Kali b była ŭ im patreba, čynilisia b niejkija kankretnyja zachady, a to za tyja hady, jak Aleś Lavonavič lažaŭ, nichto nie patryvožyŭ mianie.
Dyj niama z kim pracavać. Znaŭcy, veterany Encyklapedyi sychodziać. Voś i Aleś Lavonavič…
Zaniasu mietadyčki i słoŭnik EHB u archiŭ.
