Śviatkavańnie Dnia vajskovaj słavy ŭ aršanskich vakolicach raściahnułasia amal na try dni. Samadziejnyja mastackija imprezy z roznaj kolkaściu ŭdzielnikaŭ źmianiali adna adnu, i minułaj nočču na Aršanščynie adbyŭsia jašče adzin kancert biełaruskich bardaŭ.

Praz toje, što bardaŭski fest «Aršanskaja bitva» niekalki apošnich hod zryvała milicyja, jon bolš nie prachodzić u vyhladzie vialikaha kancertu z načoŭkaj u namiotach
na znakamitym poli Aršanskaj bitvy, što adbyłasia 8 vieraśnia 1514 hodu.
Sioleta na histaryčnym poli nie śpiavali. Ale tut prajšli i uskładańnie kvietak, i supolnaja malitva ŭ pamiać pra palehłych vajaroŭ.
Bardaŭskija śpievy hučali ŭ inšych miaścinach, chacia pasłuchać ich mahli daloka nia ŭsie achvotnyja — bo kancerty ładzilisia ŭ vymušanych umovach kanśpiracyi.

«Uviečary 8 vieraśnia my sabralisia pad vioskaj Bryli, u vuści nievialikaj račułki Vodźbicy.

Śpiavali amal da samaj ranicy, chacia było nas zusim niašmat, kala dziasiatka čałaviek. U tym liku dvoje śpievakoŭ, ja i Mikoła Rudkoŭski», — apavioŭ viadomy bard Andrej Mielnikaŭ.
Milicyja ŭsio-tki zavitała na patajemnaje miesca, dadaŭ spadar Andrej. Va ŭsich prysutnych pravieryli dakumienty
i pierapisali asabistyja dadzienyja. Ale nikoha nie zatrymlivali.

Niahledziačy na toje, što bardaŭski fest źmianiŭ farmat, i kancerty prachodziać u padpolnych umovach, pole Aršanskaj bitvy nie zabytaje.

Hetymi dniami na im pabyvała nie mienš za sto čałaviek, jakija pryjazdžali siudy biez usialakich papiarednich damoŭlenaściaŭ.
I nad polem, jaki i ŭ minułyja hady, łunali bieł-čyrvona-biełyja ściahi.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?