Z sajta Evening Standard źnikła publikacyja pra Łukašenku i Chalip 6

Z sajta brytanskaj haziety Evening Standard źnikła publikacyja z vytrymkami ź intervju Alaksandra Łukašenki, dzie jon vykazvaŭsia pra Irynu Chalip. A ŭ pres-słužbie prezidenta zapeŭnivajuć, što nijakamu Olivieru Pułu kiraŭnik Biełarusi intervju nie davaŭ.

Pry zvarocie da staronki z tekstam materyjału źjaŭlajecca paviedamleńnie: «Vybačajcie! My nie možam dać dostup da staronki, jakuju vy šukajecie. Hetaja staronka mahła być vydalenaja».

Nahadajem, u publikacyi pad zahałoŭkam «Apošni dyktatar Jeŭropy pahadziŭsia adpuścić žurnalistku paśla prośby Standard» byli apublikavanyja siensacyjnyja pryznańni Alaksandra Łukašenki, jakija datyčać ułasnaha karespandenta «Novaj haziety» i žonki eks-kandydata ŭ prezidenty Biełarusi Andreja Sańnikava — Iryny Chalip.

Nibyta ŭ intervju žurnalistu vydańnia Olivieru Pułu Łukašenka zajaviŭ, što hatovy adpuścić Chalip:

«A što, jana tut? Ja dumaŭ, jana ŭ Maskvie. Adpraŭcie siońnia ž ź viačernim kaniom. Zabirajcie i bolš siudy nie pryvoźcie. Ja pra hetaha čałavieka naohuł havaryć nie mahu. Nikoli daremna nie vymaŭlajecie hetaje słova. Vy chočacie jaje ŭ Maskvu — viazicie», — pryvodzić słovy Łukašenki «Novaja hazieta» sa spasyłkaj na brytanskaje vydańnie.

Zatym Łukašenka nibyta źviarnuŭsia da adnaho z pamočnikaŭ: «Udakładnicie, chto naohuł hetym zajmajecca — ź milicyi ci chto tam, i mnie skažycie. <…> Bačycie, dyktatura taksama dobraja. Ni adzin prezident adrazu nie pryniaŭ by rašeńnie, a ja voś pryniaŭ. <…> Chalip vy siońnia vieziacie zamiest žonki dadomu».

Jak mianiajucca teksty ŭ hazietach

Źmianiłasia i publikacyja na sajcie «Novaj haziety». U pieršapačatkovym varyjancie čytajem:

«Siońnia ŭ brytanskaj štodzionnaj haziecie The Evening Standard byli apublikavanyja siensacyjnyja pryznańni prezidenta Alaksandra Łukašenki, jakija datyčać ułasnaha karespandenta „Novaj“ Iryny Chalip. Na minułym tydni prezident daŭ intervju žurnalistam haziety, dzie zhadaŭ pra palitviaźniaŭ, dyktaturu i skinutych na Minsk samalotam plušavych miadźviedzikaŭ. Adno z pytańniaŭ žurnalista haziety Oliviera Puła datyčyła Iryny».

U novym:

«Siońnia ŭ brytanskaj štodzionnaj haziecie Independent byli apublikavanyja siensacyjnyja pryznańni prezidenta Alaksandra Łukašenki, jakija datyčać ułasnaha karespandenta „Novaj“ Iryny Chalip. Na minułym tydni prezident daŭ intervju haziecie, u jakim zhadaŭ pra palitviaźniaŭ, dyktaturu i skinutych na Minsk samalotam plušavych miadźviedzikaŭ. Adno z pytańniaŭ intervjujera Jaŭhiena Lebiedzieva datyčyła Iryny».

Cikava, što na sajcie Independent materyjału pra Łukašenku i Chalip niama.

Cytaty supravadžalisia videazapisam.

«Nijakaha Oliviera Puła i nijakaha Evening Standard nie było»

U pres-słužbie prezidenta zajavili, što nijakaha intervju žurnalistu na imia Olivier Puł z haziety Evening Standard Alaksandr Łukašenka nie davaŭ.

— Nijakaha Oliviera Puła i nijakaha Evening Standard nie było, — zajaviŭ kiraŭnik pres-słužby prezidenta Pavieł Lohki.

Adznačym, što vydańni Evening Standard i Independent naležać rasijskamu pradprymalniku Alaksandru Lebiedzievu. U 2009 hodzie jon nabyŭ kantrolny pakiet akcyj Evening Standard za simvaličnuju sumu 1 funt sterlinhaŭ, u 2010-m za tuju ž sumu jon kupiŭ i Independent. 39% akcyj «Novaj haziety» taksama naležać Alaksandru Lebiedzievu.

9 kastryčnika Alaksandr Łukašenka daŭ intervju brytanskaj haziecie Independent, a taksama karparacyi «Bi-bi-si». Pa biełaruskim telebačańni byli pakazanyja frahmienty hetaha intervju. Całkam jano jašče nie vychodziła. Siarod inšaha paviedamlałasia, što biełaruski prezident pahutaryŭ z uładalnikam vydańnia Jaŭhienam Lebiedzievym, Na frahmientach videa možna zaŭvažyć, što biełaruski kiraŭnik, źviartajučysia da surazmoŭcy, niekalki razoŭ nazyvaje jaho pa imieni — Ženia.

Jaŭhien Lebiedzieŭ — «śviecki leŭ i hieroj mistyfikacyj rasijskaj i brytanskaj žoŭtaj presy. Syn Alaksandra Lebiedzieva, viadomaha bankira i byłoha deputata Dziaržaŭnaj dumy RF, žyvie i zajmajecca biznesam u Łondanie. (…) U pačatku 2008 hoda staŭ hienieralnym dyrektaram łondanskaj haziety Evening Standard», — tak piša pra Lebiedzieva-małodšaha «Snob». U anhłamoŭnym artykule Vikipiedyi, pryśviečanym Jaŭhienu Lebiedzievu, jaho nazyvajuć uładalnikam i vydaŭcom Evening Standard i vydaŭcom Independent.

news.tut.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH