Na poŭdni Nihieryi byli vykradzieny šaściora rasijskich marakoŭ i ich kaleha z Estonii — hetuju infarmacyju paćvierdziła MZS Rasii.
«Pavodle infarmacyi, atrymanaj pasolstvam Rasii ŭ Nihieryi ad pradstaŭnikoŭ sudnaŭładalnika, pry napadzie nichto z ekipaža nie paciarpieŭ», — havorycca ŭ paviedamleńni departamienta infarmacyi i druku MZS RF. Pasolstva RF robić usio nieabchodnaje dla vyzvaleńnia rasijan sumiesna z uładami krainy.
Šelfavy buksir i pastanoŭščyk jakaraŭ Bourbon Liberty 249 byŭ atakavany piratami (ci bajevikami) u delcie Nihiera 15 kastryčnika abo ŭ noč na 16 kastryčnika, sudna znachodziłasia blizu nihieryjskaha porta Pieninhton. Złačyncy ŭziali ŭ załožniki siem čałaviek ź liku ekipaža i ŭciakli razam ź imi. Astatnija dzieviać čałaviek pryviali Bourbon Liberty 249 u nihieryjski port Onie.
Viadoma, što ŭ ekipaž karabla Bourbon Liberty 249 uvachodzić biełarus Siarhiej Kurhanovič.
Vyśviatleńniem, ci jość u liku vykradzienych marakoŭ hramadzianie Biełarusi, zajmajucca biełaruskija dypłamaty.