Pravaabaroncu Alesiu Bialackamu ŭ babrujskaj kałonii № 2 abmiežavali mahčymaść atrymańnia miedycynskich banderolaŭ, paviedamiła žonka Bialackaha Natalla Pinčuk.

Pavodle jaje słoŭ, na dniach jana dasyłała Bialackamu miedycynskuju banderol, bo jamu heta było dazvolena. «Jon napisaŭ śpis nieabchodnych jamu lekaŭ, uzhadniŭ ich ź miedycynskaj čaściu kałonii, vysłaŭ mnie. Ja kuplała hetyja leki. Adnak, jak vyśvietliłasia, hetuju banderol abmiežavali vahoj tolki ŭ adzin kiłahram. Zhodna z paštovymi standartami, banderol pavinna važyć da dvuch kiłahram. Ja razmaŭlała sa svajakami inšych źniavolenych — jany z takoj prablemaj nie sutykalisia, u ich vaha miedycynskaj banderoli nie abmiažoŭvałasia», — skazała Pinčuk.

Pryčynu abmiežavańnia vahi miedycynskaj banderoli Natalli Pinčuk u kałonii nie nazvali.

Adnak navat z hetaj banderollu ŭźnikli prablemy. «Hetuju banderol ja adpraviła, ale jana znoŭ viarnułasia da mianie. Na kanviercie napisana, što nibyta parušany niejkija terminy adpraŭki. Ale nijakich pamyłak nie było — banderol mieŭ prava atrymać moj muž. Adnak zaraz da zimy jon budzie znachodzicca ŭ kałonii bieź lekaŭ i vitaminaŭ», — skazała Pinčuk.

Hetuju ž banderol jana vysłała ŭ kałoniju paŭtorna.

«Ja nie viedaju, z čym heta moža być źviazana. Z Alesia zrabili złosnaha parušalnika, naviesili jamu parušeńni režymu,
i zaraz nacisk uzrastaje. Vidać, ułady robiać usio mahčymaje, kab abciažaryć jamu žyćcio ŭ turmie», — skazała Pinčuk.

Žonka Bialackaha nie vałodaje infarmacyjaj ab tym, ci prapanoŭvała jamu administracyja kałonii napisać prašeńnie ab pamiłavańni. «Aleś pra takija rečy ničoha nie pisaŭ. Adnak, miarkujučy pa tym, jak dziejničajuć administracyi papraŭčych ustanoŭ u dačynieńni da inšych palitźniavolenych, ja mahu dumać, što takaja prapanova była, Aleś jaje adchiliŭ, paśla čaho nacisk uzmacniŭsia», — miarkuje Pinčuk.

Sud nad Bialackim adbyŭsia ŭ listapadzie 2011 hoda. Pravaabaroncu pryznali vinavatym va ŭtojvańni dachodaŭ u asabliva bujnym pamiery i pryhavaryli da čatyroch z pałovaj hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Padstavaj dla kryminalnaha pieraśledu pravaabaroncy stała najaŭnaść u jaho rachunkaŭ u bankach Litvy i Polščy. Sud nie ŭličyŭ toje, što hrošy, jakija pastupali na hetyja rachunki, vykarystoŭvalisia dla pravaabarončaj dziejnaści. Nie byŭ uziaty pad uvahu i toj fakt, što ŭron, jaki, pavodle viersii suda, nanios Bialacki, byŭ poŭnaściu pahašany za košt dobraachvotnych achviaravańniaŭ hramadzian.

Aryšt Bialackaha vyklikaŭ šyroki rezanans. Biełaruski pravaabaronca abvieščany viaźniem sumleńnia.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?