Padčas pracy pa arhanizacyi ekanamičnaj biaśpieki dziaržavy i spynieńni złačynstvaŭ, skiravanych na ŭščamleńnie zakonnych pravoŭ i intaresaŭ hramadzian Biełarusi, Kamitetam dziaržaŭnaj biaśpieki zatrymany adzin z kaardynataraŭ finansavaj piramidy «MMM-2011», jaki chavaŭsia ad kryminalnaha pieraśledu.
Pra heta paviedamili ŭ centry infarmacyi i hramadskich suviaziaŭ KDB.

Zatrymanamu vystaŭlena abvinavačańnie va ŭčynieńni złačynstva, praduhledžanaha č. 3 art. 233 KK (niezakonnaja pradprymalnickaja dziejnaść).

Padčas rasśledavańnia kryminalnaj spravy ab niezakonnaj dziejnaści na terytoryi Biełarusi finansavaj piramidy «MMM-2011», jakaja raspačata KDB i jakuju rasśleduje Śledčy kamitet, ustanoŭlena datyčnaść zatrymanaha da ažyćciaŭleńnia niezakonnych finansavych apieracyj i zavałodańnia hrašovymi srodkami biełaruskich hramadzian šlacham padmanu.

CIHS KDB nahadvaje, što kaardynatar finansavaj piramidy i inšyja asoby, dziejničajučy ad imia nie zarehistravanaj u padatkovych orhanach i orhanach miascovaj vykanaŭčaj ułady arhanizacyi «MMM-2011», ažyćciaŭlali na terytoryi Biełarusi dziejnaść pa pryjomie ŭkładaŭ i stavak na vyjhryš ad nasielnictva. Vypłata pracentaŭ pa ŭkładach abo viartańnie ŭkładzienych hrašovych srodkaŭ z ulikam ahavoranaha ŭznaharodžańnia (vyjhryšu) ažyćciaŭlałasia členami hrupy za košt pryciahnieńnia novych układaŭ (stavak) hramadzian, jakija naŭmysna ŭvodzilisia ŭ zman adnosna zakonnaści i ekanamičnaj metazhodnaści ŭčynieńnia takich apieracyj.

U vyniku niezakonnaj dziejnaści kampanii «MMM-2011» u finansavyja machinacyi apynulisia ŭciahnutymi niekalki tysiač hramadzian Biełarusi.
Asnoŭny kantynhient udzielnikaŭ finansavaj piramidy skłali maładyja ludzi 1985–1990 hadoŭ naradžeńnia, nieznajomyja ź dziejnaściu «MMM» pačatku 1990-ch hadoŭ i jaje niehatyŭnymi nastupstvami dla miljonaŭ hramadzian.

Kamitet dziaržaŭnaj biaśpieki jašče raz źviartaje ŭvahu hramadzian na niezakonnaść ažyćciaŭleńnia lubych układnych hrašovych apieracyj ź nie zarehistravanymi va ŭstanoŭlenym paradku arhanizacyjami, pad šyldaj jakich mohuć dziejničać finansavyja piramidy.

Supracoŭniki minskaha ofisa «MMM-2011» byli zatrymany śpiecsłužbami 16 sakavika. U dačynieńni da ich KDB raspačaŭ spravu na padstavie č. 3 art. 233 KK. Rasśledavańnie było pieradadziena ŭ Śledčy kamitet.

Na sustrečy z žurnalistami 27 krasavika staršynia Śledčaha kamiteta Valeryj Vakulčyk paviedamiŭ, što ŭron ad dziejnaści «MMM-2011» u Biełarusi aceńvajecca ŭ 800 młn. rubloŭ. Pavodle jaho słoŭ, pa spravie prachodziać piać čałaviek, jany znachodziacca pad vartaj. Fihurantam spravy vystaŭlena abvinavačańnie ŭ niezakonnaj pradprymalnickaj dziejnaści na padstavie č. 3 art. 233 Kryminalnaha kodeksa. «U spravy jość dobryja sudovyja pierśpiektyvy», — zapeŭniŭ Vakulčyk.

Viačasłaŭ Budkievič, BiełaPAN.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?