Partyja BNF vystupiła ŭ abaronu hrodzienskich humanitaryjaŭ, jakija pieraśledujucca za svaje pohlady i pierakanańni.

U zajavie Partyi BNF idzie razmova pra Valera Bułhakava, byłoha redaktara niedziaržaŭnaha časopisa ARCHE, a taksama pra dvuch zvolnienych vykładčykaŭ Hrodzienskaha dziaržaŭnaha ŭniviersiteta imia Janki Kupały — kandydata histaryčnych navuk Andreja Čarniakieviča i staršaha vykładčyka kafiedry teoryi i historyi dziaržavy i prava Ihara Kuźminiča.

Jak adznačajecca ŭ zajavie, apošnija dva miesiacy ŭ Biełarusi «nazirajucca niebiaśpiečnyja prajavy ŭzmacnieńnia represij i pieraśledu ŭ humanitarnaj śfiery», pryčym usie jany mieli miescaŭ Hrodnie. Partyja BNF zaklikaje ministra adukacyi Biełarusi Siarhieja Maskieviča inicyjavać adnaŭleńnie na pracy Andreja Čarniakieviča i Ihara Kuźminiča. U advarotnym vypadku ŭniviersitet «stracić maralnaje prava nasić imia biełaruskaha nacyjanalnaha paeta Janki Kupały», padkreślivajecca ŭ zajavie.

Akramia taho, adznačaje Partyja BNF, ułady zładzili ŭ Hrodnie «pahrom tvorčaha i navukova-vydavieckaha asiarodku, jaki abjadnaŭsia vakoł časopisa ARCHE». «Hetaja akcyja pačałasia z aryštu knih i časopisaŭ prama padčas prezientacyi vydańniaŭ», — adznačajecca ŭ zajavie.

Na dumku jaho aŭtaraŭ, padobnyja «prajavy ciemrašalstva jadnajuć palityku ciapierašniaj ułady z tymi časami, kali na biełaruskaj ziamli panavali inšyja dziaržavy, što vykaraniali biełaruskija škoły i zabaraniali biełaruskaje drukavanaje słova».

«U vypadku zvalnieńnia hrodzienskich vykładčykaŭ na padstavie ich publikacyj majuć miesca prykmiety parušeńnia art. 14 Pracoŭnaha kodeksa, jaki zabaraniaje dyskryminacyju ŭ śfiery pracoŭnych adnosinaŭ u suviazi ź pierakanańniami. Prykry vypadak zvalnieńnia historyka Andreja Čarniakieviča moža pierakreślić navukovyja dasiahnieńni hrodzienskaj histaryčnaj škoły, a zvalnieńnie Ihara Kuźminiča „za kazki“ stanie plamaj na imidžy ŭniviersiteta, jaki nosić imia biełaruskaha paeta Janki Kupały», — zajaŭlaje Partyja BNF.

Palityki zaklikajuć kiraŭnictva krainy «spynić ahresiŭny pieraśled biełaruskich humanitaryjaŭ, u tym liku pieraśled kandydata fiłasofskich navuk Valeryja Bułhakava, i źniać zabaronu na raspaŭsiudžvańnie vydańniaŭ tvorčaha asiarodku ARCHE (časopis i knihi) praź dziaržaŭnyja i pryvatnyja sietki masavaha prodažu ŭ roźnicu».

Pieraśled vykładčykaŭ i vučonych Hrodzienskaha dziaržuniviersiteta, a taksama vydavieckaha asiarodku ARCHE źjaŭlajecca «pahrozaj fundamientu biełaruskaj nacyjanalnaj dziaržaŭnaści», zajaŭlaje Partyja BNF. «Va ŭmovach, kali biełaruskaja dziaržaŭnaść znachodzicca pad pastajannym ciskam z Uschodu, a dziaržaŭnaja ŭłada chvareje na aŭtarytaryzm i niedachop adčuvańnia nacyjanalnych intaresaŭ, adukacyja i kultura źjaŭlajucca tymi śfierami, na jakich bazujecca identyčnaść biełarusaŭ jak jeŭrapiejskaj nacyi. Vykaranieńnie biełaruskaj adukacyi i druku pahražaje dehradacyjaj biełarusaŭ ad statusa nacyi da stanu etničnaj supolnaści», — padkreślivajecca ŭ zajavie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?