Mikałaj Karpiankoŭ
Karpiankoŭ staraŭsia nie traplać u abjektyvy fotakamier.
Pałkoŭnik Karpiankoŭ zahadam ministra pryznačany načalnikam upraŭleńnia pa narkakantroli i supraćdziejańni handlu ludźmi (UNiPHŁ).U pres-słužbie MUS hetuju infarmacyju paćvierdzili, adnak nie zmahli skazać, jakim dniom datavany zahad. «Na minułym tydni ci raniej», - tolki i ŭdałosia pakul ad ich paznać.
Papiarednik Karpiankova -- pałkoŭnik Alaksandr Haŭryłaŭ, jaki ŭznačalvaŭ upraŭleńnie z 2008 hoda, - syšoŭ u adstaŭku pa dasiahnieńni 50-hadovaha ŭzrostu: 9 kastryčnika jon adznačyŭ jubilej.Kazali, što Alaksandru Uładzimiraviču prapanoŭvali padoŭžyć kantrakt jašče na piać hadoŭ, adnak jon admoviŭsia. Da miesca zaŭvažyć, što sychod Haŭryłava jaho padnačalenyja ŭspryniali sa škadavańniem. U toj ža čas čutki pra toje, što na jaho miesca pryjdzie Mikałaj Karpiankoŭ, byli ŭspryniaty biez entuzijazmu. Ale, jak kažuć u hetym asiarodku, - zahady nie abmiarkoŭvajucca.
Što tyčycca Karpiankova, to pra jaho ničoha nie było čuvać amal dva hady.27 śniežnia 2010 h. tahačasny ministr unutranych spraŭ Anatol Kulašoŭ svaim zahadam vyzvaliŭ jaho ad zajmanaj pasady kamandzira śpiecpadraździaleńnia pa baraćbie z teraryzmam «Ałmaz» MUS. Na miesca Karpiankova byŭ pryznačany vychadziec z Pamiežnaha kamiteta pałkoŭnik Viktar Zurajeŭ.
Jak paviedamlała ŭpraŭleńnie infarmacyi i hramadskich suviaziej MUS, «hetaje pryznačeńnie źviazana ź pieravodam Mikałaja Karpiankova na inšuju pasadu ŭ sistemie Ministerstva ŭnutranych spraŭ i abumoŭlena mierapryjemstvami ŭ MUS, nakiravanymi na pavyšeńnie efiektyŭnaści apieratyŭna-słužbovaj dziejnaści orhanaŭ unutranych spraŭ u baraćbie sa złačynnaściu i harantavańnie hramadskaj biaśpieki ŭ krainie. Kiraŭnictva milicejskaha viedamstva adznačaje sumlennuju šmathadovuju pracu Karpiankova i vysoka cenić jaho asabisty ŭkład u padtrymańnie pravaparadku ŭ Biełarusi».
Jakuju pasadu ŭvieś hety čas zajmaŭ pałkoŭnik Karpiankaŭ - nieviadoma. Pra jaho naohuł mała źviestak.Mikałaju Mikałajeviču 44 hady. U 1992-1994 hadach jon źjaŭlaŭsia kamandziram bajavoj hrupy padraździaleńnia «Bierkut», na bazie jakoha ŭ 1994 hodzie i byŭ stvorany «Ałmaz». Zatym słužyŭ u «inšych miescach», ź ich viadoma tolki adno: słužba biaśpieki prezidenta. Śpiecpadraździaleńnie pa baraćbie z teraryzmam «Ałmaz» Karpiankoŭ ŭznačaliŭ u 2003 hodzie. U lutym 2004-ha ŭkazam prezidenta jamu było daterminova prysvojena zvańnie pałkoŭnika.
Śpiecyfika słužby Karpiankova była takaja, što jon staraŭsia nie traplać u abjektyvy fotakamier. Amal na ŭsich fotazdymkach jaho tvar razmyty.Padobna na toje, što hetaja tradycyja vykonvajecca da hetaha času. Na sajcie MUS - tolki proźvišča, imia novaha načalnika, niama navat karotkaha pasłužnoha śpisu. U pres-słužbie MUS zaŭvažyli, što heta «nieabaviazkova». A voś Alaksandr Haŭryłaŭ svoj tvar nie chavaŭ. Bolš za toje, pasadu načalnika UNiPHŁ razumieje całkam kankretnuju publičnaść. I Haŭryłaŭ ciesna kantaktavaŭ z žurnalistami, z pradstaŭnikami hramadskich arhanizacyj, udzielničaŭ u pres-kanfierencyjach, davaŭ intervju. Pakolki Biełaruś udzielničaje ŭ šerahu značnych mižnarodnych prahram pa baraćbie z narkotykami i supraćdziejańni handlu ludźmi, to były načalnik UNiPHŁ davoli časta vyjazdžaŭ u krainy Zachodniaj Jeŭropy.
Varta zaŭvažyć, što eks-kamandzir «Ałmazu» nie ŭvachodzić u lik biełaruskich čynoŭnikaŭ, jakim zabaronieny ŭjezd u krainy ES, chacia trapiŭ u pole zroku ŚMI jašče ŭ 2006 hodzie, padčas kampanii pa vybarach prezidenta.Tady kazali, što mienavita pad kiraŭnictvam pałkoŭnika 2 sakavika 2006 h. bajcy «Ałmaza» zatrymali i źbili kala Pałaca čyhunačnikaŭ kandydata ŭ prezidenty Alaksandra Kazulina, jaki sprabavaŭ zarehistravacca delehatam treciaha Usiebiełaruskaha narodnaha schodu.
... Zaŭsiody mierkavałasia, što dla słužby ŭ kryminalnym błoku milicyi, kudy ŭvachodzić UNiPHŁ, i dla kiraŭnictva takimi padraździaleńniami patrabujecca surjozny vopyt apieratyŭnaj pracy. Jaki mieŭsia, naprykład, u Haŭryłava i ŭsich jaho papiarednikaŭ.
Niaŭžo ciapier u MUS kadravaja prablema nastolki vialikaja, što ŭ kryminalnym vyšuku bolš nie zastałosia prafiesijnych syščykaŭ?Ci ahulnaja kryminahiennaja situacyja nastolki abvastryłasia, što i ŭ «intelektualnych» strukturach MUS patrabujecca siłavy padychod i kantrol?
A moža, kamanda viarnuć pałkoŭnika Karpiankova ŭ stroj pastupiła źvierchu, dy z padychodziačych tolki hetaja pasada była vakantnaj?
