Homielskija pradprymalniki z dapamohaj pratestaŭ dabilisia svajho — arendnaja staŭka pavysicca niaznačna

Pradprymalniki homielskaha handlovaha centra «Sakret» 27 kastryčnika padpisali dahavory arendy z novym ułaśnikam — TDA «NP-Servis». Arendnaja staŭka budzie pavyšana na 10%, a kamunalnyja płaciažy źnižanyja na 20–25%.

U HC pracuje prykładna 400 pradprymalnikaŭ, u jakich uźnik kanflikt z novym ułaśnikam handlovaha pradpryjemstva z-za pavyšeńnia arendnaj płaty z 45–55 da 120 jeŭra za kvadratny mietr. Taksama rabotniki HC byli aburanyja novymi prajektami dahavoraŭ, dzie prapisanyja «kabalnyja ŭmovy». Pradprymalniki źviarnulisia pa dapamohu da miascovych uładaŭ, jakija praviali dasudovaje ŭrehulavańnie kanfliktu, i da RHA «Pierśpiektyva», kiraŭnik jakoha, Anatol Šumčanka, nieadnarazova pryjazdžaŭ u Homiel, kab akazać arhanizacyjnuju i jurydyčnuju padtrymku rabotnikam HC.

23 kastryčnika ŭ abłvykankamie prajšła narada z udziełam pradstaŭnikoŭ miascovaj ułady, novaha ŭłaśnika i pradprymalnikaŭ.

Pa vynikach narady načalnik adździeła pradprymalnictva kamiteta ekanomiki abłvykankama Maryna Kryvuń paviedamiła: «My ŭłaśniku dakładna dali zrazumieć, što niama padstaŭ dla ŭźniaćcia arendnaj płaty i nichto nie daść ułaśniku samavolničać, svaich pradprymalnikaŭ my nie kiniem».

Pra novyja ŭmovy damovy paviedamiŭ Anatol Šumčanka: «My rady, što ŭdałosia adstajać pravy pradprymalnikaŭ i zaklučyć novyja dahavory na prymalnych umovach. Asablivaściu hetych dahavoraŭ jašče źjaŭlajecca toje, što jany zaklučanyja na termin 5 hadoŭ, a raniej zaklučalisia na termin ad troch da 11 miesiacaŭ. Nas pačuli. U hetym vypadku šmat zrabiŭ Saviet pradprymalnikaŭ handlovaha centra, nielha nie adznačyć i dziejańni miascovych uładaŭ, jakija padtrymali rabotnikaŭ HC».

Šumčanka adznačyŭ, što 46 pradprymalnikaŭ padpisali novyja staŭki dahavoraŭ arendy, pa jakich arenda ŭzrasła ŭ dva-čatyry razy. «My, RHA „Pierśpiektyva“, prapanoŭvali pradprymalnikam abjadnacca i być kansalidavanymi. Ale niekatoryja nie pavieryli nam, pajšli i padpisali novyja dahavory pa pavyšanych staŭkach. A ciapier ułaśnik skazaŭ, što tyja dahavory pierahladać nie budzie. Heta prykład usim, što ŭ kanfliktnych situacyjach vielmi važna zmahacca za svaje pravy razam, a nie tajkom padpisvać dahavory», — zajaviŭ Šumčanka.

Jon spadziajecca, što novy ŭłaśnik budzie mieć partniorskija adnosiny z pradprymalnikami.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH