Dakumientalist Jury Chaščavacki atrymaje «Łaŭrovuju halinu» — samuju hanarovuju premiju rasijskaha dakumientalnaha kino, paviedamiŭ «Interfaks».

«Heta, kaniečnie, było niečakana, — raskazaŭ Chaščavacki karespandentu Našaj Nivy. —

Mnie pazvanili z rady premii, skazali, što ja ŭznaharodžany za ŭkład u kinaletapis. Letaś Sakuraŭ atrymlivaŭ «Halinu» ŭ hetaj naminacyi».
Ale ŭsio ž Sakuraŭ — rasijski tvorca, a Chaščavacki žyvie ŭ Biełarusi. Ci stvaralniki ŭklučajuć jaho tvorčaść u darobak rasiejskaj kultury?

«Heta maje siabry, ja ź imi vialikaje žyćcio pražyŭ u kino, — kaža režysior. — Pačynaŭ jašče ŭ savieckija časy. Ja zaŭždy byŭ pierakanany, što dakumientalnaje kino naradziłasia ŭ SSSR i liču siabie pradstaŭnikom toj škoły dakumientalistyki. Choć ciapier nichto nie admaŭlaje, što my žyviom u roznych krainach, z usimi ich nacyjanalnymi i kulturnymi adroźnieńniami. Ale, jak u pieśni piajecca, «kali radaść na ŭsich adna — na ŭsich i adna biada». A biada ŭ nas i ŭ Rasii, ja liču, siońnia adna: raspaŭzańnie našaha režymu na ŭsiu postsavieckuju prastoru.

Hadoŭ šeść tamu, kali ja źniaŭ «Płošču»;, mnohija, u tym liku i tyja, chto hanaruje mianie siońnia premijaj, kazali: nu navošta tabie heta treba, hetaja palityka. Siońnia jany pabačyli štości padobnaje va ŭłasnaj krainie».

Chaščavacki zadumaŭ novy prajekt, na realizacyju jakoha, pryznajecca, pakul niama srodkaŭ.

«Heta budzie film pad nazvaj «Razbeščvańnie Jeŭropy».
Jon pra toje, jak naš i rasijski biznes, karumpavanaja ŭłada ŭpłyvaje na jeŭrapiejcaŭ, spakušaje, razbeščvaje ich, uciahvajučy ŭ zładziejskija schiemy.
Voś vypadak z prodažam na Zachad raspuščalnikaŭ i rastvaralnikaŭ — chiba jon byŭ by mahčymy, kali b nie było kantrahientaŭ u Jeŭropie?
Abo vypadak z kancernam Daimler AG, źvinavačanym u davańni chabaraŭ u Maskvie?
Taki film nie budzieš rabić hałasłoŭna: treba dakumienty, treba vialikaja praca daśledčykaŭ, jurystaŭ, kab usio było abhruntavana.
A na heta ŭsio treba hrošy. Havaryć pra hetyja rečy abaviazkova treba. Ja baču vialikuju niebiaśpieku ŭ razbeščvańni Zachadu», — kaža režysior.

«Łaŭrovaja halina» — rasiejski nacyjanalny konkurs u halinie dakumientalnaha kino i telebačańnia, zasnavany Sajuzam kiniematahrafistaŭ Rasii, jaki pravodzicca z 2000 hoda.
Na konkursie pradstaŭlenyja pracy režysioraŭ, apierataraŭ, pradziusaraŭ Rasii, a taksama filmy z usich krain śvietu na rasiejskaj movie.

Cyrymonija ŭznaharodžańnia «Łaŭrovaj haliny-2012» projdzie 15 śniežnia ŭ kinateatry «Chudožiestviennyj» u Maskvie, na cyrymonii zakryćcia festyvala «Artdokfest».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?