AHP vykazała salidarnaść z «Novym žyćciom» i źviarnułasia da Fiłareta 12

Abjadnanaja hramadzianskaja partyja (AHP) vykazvaje salidarnaść ź viernikami carkvy «Novaje žyćcio» i źviartajecca da mitrapalita Fiłareta z prapanovaj asudzić dziejańni ŭład u dačynieńni da carkvy. Pra heta havorycca ŭ zajavie, pryniataj palitradaj AHP.

Palitrada AHP adznačaje, što vysialeńnie carkvy «Novaje žyćcio» z budynka — heta «hrubaje parušeńnie Kanstytucyi krainy, jakaja abviaščaje roŭnaść usich hramadzian niezaležna ad ich relihijnych pierakanańniaŭ». U zajavie nahadvajecca, što heta nie pieršaja sproba ŭład adabrać u viernikaŭ budynak. «Hety fakt śviedčyć, što heta nie vypadkovaść, nie źbieh akaličnaściaŭ, a metanakiravanyja dziejańni siłavych struktur i staličnaj administracyi. I jany nakiroŭvajucca i kaardynujucca Administracyjaj prezidenta», — miarkuje AHP.

Palitrada partyi zaklikała nieabyjakavych hramadzian i mižnarodnuju supolnaść da salidarnaści ź viernikami.

Jak adznačyła pres-sakratar AHP Hanna Krasulina, svaboda schodaŭ, vieravyznańnia i svaboda sumleńnia harantujucca Kanstytucyjaj Biełarusi. «Adnak harant Kanstytucyi — prezident sam nie vykonvaje Kanstytucyju i nie harantuje jaje vykanańnie», — skazała Krasulina.

«Tamu my źviartajemsia da Fiłareta. Pa-pieršaje, heta čałaviek, da jakoha harant Kanstytucyi prysłuchoŭvajecca.

Pa-druhoje, jaho aŭtarytet u hramadstvie biassprečny, jaho słova važkaje. Nu i pa-treciaje, my ličym, što i pravasłaŭnaja carkva, i „Novaje žyćcio“ — usio adno chryścijanie, i „Novamu žyćciu“ ciapier patrebna padtrymka pradstaŭnikoŭ inšych kanfiesij. Tamu što kali ciapier vyhaniać z carkvy pratestantaŭ, potym voźmucca za katolikaŭ, a potym i za pravasłaŭnych», — ličyć Krasulina.

Zvarot, pavodle jaje słoŭ, budzie adpraŭleny Fiłaretu najbližejšym časam.

Jak paviedamlałasia raniej, na 5 śniežnia haspadarčy sud Minska pryznačyŭ prymusovaje vysialeńnie relihijnaj abščyny chryścijan poŭnaha Jevanhiella «Carkva «Novaje žyćcio» z doma № 72 pa vulicy Kavalova.

Adpaviednaje pradpisańnie abščyna atrymała 27 listapada. Prymusovaje vysialeńnie, jak havorycca ŭ dakumiencie, pryznačana «na padstavie sudovaha zahada haspadarčaha suda horada Minska pa spravie № 526–12/2009 ad 23 kastryčnika». Kiraŭniku carkvy pradpisana da 11.00 5 śniežnia «vyzvalić pamiaškańnie, a taksama padrychtavać kamplekty klučoŭ dla pieradačy patrabavalniku».

Pryblizna siem hadoŭ Minharvykankam sprabuje vysielić carkvu «Novaje žyćcio» z hetaha budynka. U 2005 hodzie haradskija ŭłady pazbavili relihijnuju abščynu prava karystańnia ziamielnym učastkam, vydzielenym joj u biesterminovaje karystańnie.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH