Hienkonsulstva ŭ Biełastoku zaklikaje biełarusaŭ być pilnymi pry kupli tavaraŭ u Polščy. Ab hetym paviedamiŭ hienieralny konsuł Biełarusi ŭ Biełastoku Alaksandr Bierabienia.
Štohod napiaredadni kaladnych i navahodnich śviataŭ, u siezon rasprodažaŭ raście kolkaść biełarusaŭ, jakija vyjazdžajuć za miažu.
Razam z tym raście i kolkaść zvarotaŭ suajčyńnikaŭ u dyppradstaŭnictva Biełarusi za miažoj, u asnoŭnym — pa dapamohu. Pavodle Alaksandra Bierabieni, u hienkonsulstva Biełarusi ŭ pamiežnym Biełastoku čaściej za ŭsio biełaruskija hramadzianie źviartajucca z prośbaj dapamahčy viarnucca dadomu.
«Ździajśniajučy ŭ śpiešcy zakupy, mnohija biełarusy hublajuć pilnaść i stanoviacca achviarami kišennych złodziejaŭ i navat razbojnych napadaŭ na aŭtastajankach ci na rynku, — raspavioŭ Alaksandr Bierabienia.— Hublajuć biełarusy pry hetym nie tolki kašalki, ale i ŭsie dakumienty, u tym liku rehistracyjnyja na aŭtamabili, a taksama pašparty, bieź jakich jany nie mohuć dakazać lehalnaść svajho znachodžańnia za miažoj i pierasiekčy miažu, kab viarnucca dachaty».
U takim vypadku biełaruskija hramadzianie mohuć źviarnucca da konsuła i atrymać časovy dakumient, jaki zaśviedčvaje asobu i jaki dazvalaje viarnucca dadomu.
Siarod inšych prablem biełaruskich pakupnikoŭ u Polščy konsuł adznačyŭ parušeńnie ich pravoŭ jak spažyŭcoŭ tavaru.«Mnohija našy suajčyńniki spadziajucca na sumlennaść handlovych centraŭ i pradaŭcoŭ i nie praviarajuć u kramach ceny z dapamohaj sčytvalnych pryład.
Jakoje ž byvaje ich ździŭleńnie, kali paśla vybitaha ŭ kasie čeka košty nie supadajuć z cenami, vyviešanymi nad tavaram u handlovaj zale.Paśla nabyćcia tavaru vielmi ciažka niešta dakazać pradaŭcu, asabliva bieź viedańnia movy i zakanadaŭstva «, — skazaŭ jon.
Uźnikajuć taksama prablemy z kuplaj darahoj bytavoj i elektratechniki.Paśla vynasu niepravieranaha tavaru z kramy dakazać pachodžańnie paškodžańniaŭ, raskolin, drapin i niekamplektnaści čaściakom prosta niemahčyma.
Alaksandr Bierabienia padkreśliŭ, što ŭ čas pajezdki za miažu treba być aściarožnymi i ŭvažlivymi, nie trymać kašalki i dakumienty ŭ adnym miescy.
Nie pieraškodzić mieć pry sabie ksierakopiju pašparta.
Varta taksama źviartać uvahu na ceny, vyviešanyja nad tavaram, pa mahčymaści skanavać ich admysłova vyviešanymi dla hetaha ŭ handlovych załach pryładami pierad pakupkaj, a taksama praviarać darahuju elektratechniku na miescy ŭ prysutnaści pradstaŭnikoŭ kramy.
