Tolki za hety hod u Biełarusi byŭ spynieny vychad 19 niezaležnych hazet. 11 ź ich — niepasredna pierad referendumam. Miž tym dziaržaŭnyja ŚMI paśpiachova viarnulisia ŭ syropny stan 1985 hodu: mnoha vady, mnoha cukru i nul alternatyŭnaj dumki. Tamu Biełaruskaja asacyjacyja žurnalistaŭ, što adčajna zmahajecca za vyžyvańnie niezaležnych ŚMI, siońnia pieratvaryłasia ŭ sapraŭdnaje Ministerstva infarmacyi, jakoje słužyć svabodzie słova. A jaho ministarka (słova «ministar» na łacinie, darečy, pieršapačatkova aznačała «słužyciel») — Žanna Litvina.Pry kancy hodu BAŽ atrymaŭ pačesnuju premiju imia Andreja Sacharava «Za svabodu dumki» ad Eŭraparlamentu, i staršynia kantynentalnaha parlamentu pramaŭlaŭ z trybuny pa-biełarusku. Ad BAŽ, zachavańnia svabody słova ciapier zaležyć zdolnaść biełaruskaj cyvilizacyi da samazachavańnia. Pyšna hučyć, ale tak i jość.

Uradoviec hodu — Siarhiej Sidorski

U toje, što Sidorski pratrymajecca doŭha, nichto nia vieryŭ. Jon musiŭ stacca rytualnaj achviaraj hazavaha kryzisu minułaj zimy. Ale Sidorski vyjaviŭsia vielmi haspadarlivym i samastojnym premjeram. Z hazavaj vajny nervaŭ biełaruski ŭrad vyjšaŭ pieramožcam. Pry Sidorskim ekanamičny rost u krainie dasiahnuŭ 10% za hod. Razam z tym, za hety čas žorstki ŭ adstojvańni nacyjanalnych intaresaŭ premjer nie dazvoliŭ sabie nivodnaj palityčnaj zajavy.

Palityk hodu — Michaił Marynič

Ad kanca krasavika ŭ «amerykancy» KDB znachodzicca Michaił Marynič. Jon mieŭ usio: ciopłuju pasadu pasła ŭ Łatvii, hrošy i biznes-kantakty. Adnak adroksia hetaha ŭsiaho dziela pieramieny ŭłady ŭ Biełarusi. Za što i raspłačvajecca. Źvinavačańni ŭ kradziažy ź im ža stvoranaha hramadzkaha abjadnańnia i niezakonnym zachavańni zbroi vyhladajuć sfabrykavanymi. Zatoje čałaviek z sudzimaściu aŭtamatyčna pazbaŭlajecca prava ŭdziełu ŭ prezydenckich vybarach 2006 h. Lozunh «Svabodu Maryniču» ŭvajšoŭ u repertuar zubroŭ-hraficistaŭ. Mo tolki toj fakt, što ŭ Biełarusi zastalisia palitviaźni, i jość adzinaj prykmietaj taho, što ŭ krainie zastajecca palityka.

Zamiežnik hodu — Viktar Juščanka

Juščanku paščaściła ačolić narod, jaki pieraros urad. Hieroj, pravadyr, pakutnik za Ŭkrainu — usio jon, hety palityk ź niahučnym hołasam, nie trybun i nie papulist. Hety bankir uvasobiŭ žadańnie narodu žyć pry sumlennaj uładzie ŭ demakratyčnaj krainie. Pavodle słovaŭ piśmieńnicy Aksany Zabužki, Juščanka zdoleŭ stać symbalem, jaki zachapiŭ nacyju, jak Havał čechaŭ, a Jan Pavał II palakaŭ. Jon ujaŭlaje saboj redki, paśpiachovy tolki na pierałomnych etapach historyi, typ maralnaha palityka. I heta vyjaviłasia samym važnym i zapatrabavanym.

Spartoviec hodu — Julija Nieściarenka

Na atenskaj Alimpijadzie ŭzyšła novaja zorka suśvietnaha sportu. Upieršyniu ŭ najprestyžniejšaj biehavoj dystancyi — 100 m — pieramahła spartoŭka z Eŭropy, biełaruska Julija Nieściarenka. Miljony ludziej u śviecie, jakija nie cikaviacca mižnarodnaj palitykaj, daznalisia pra Biełaruś. Ale ŭśled za pieramohaj palityka zacikaviłasia Julaj. Jaje podpisy źjaŭlalisia pad ulotkami «za Baćku», jaje fota z čyrvona-zialonym ściaham i podpisam «Na kryljach Rodziny» možna ciapier bačyć na bihbordach. I reklamuje Julija zusim nie zdarovy ład žyćcia.

Kulturnyja dziejačy hodu — Valer Bułhakaŭ i Andrej Kudzinienka

Redaktar časopisu «ARCHE» Valer Bułhakaŭ byŭ intelektualna sumlennym, pryśviaciŭšy čaćvierty numar časopisu 10-hodździu kiravańnia Łukašenki — samamu značnamu jubileju hodu — i źmiaściŭšy ŭ im ułasny artykuł «Zahadki i adhadki łukašenkaŭščyny». Sankcyi nie zabavilisia: vyhnańnie ź «Biełsajuzdrukaŭ», dziaržkniharniaŭ, padatkovaja pravierka «ARCHE» i drukarniaŭ, jakija jaho vydavali.

«ARCHE» raspracoŭvaje novaje dla Biełarusi spałučeńnie kulturnaha j palityčnaha analizu. Majem spravu z praŭdzivym myśleńniem — za jakoje navat karajuć.

Stvorany Andrejem Kudzinienkam film «Akupacyja. Misteryi» trapiŭ na Raterdamski j Maskoŭski kinafestyvali, byŭ pakazany ŭ Polščy j vydadzieny na DVD. Zabaronienaje ŭ byłoj respublicy-partyzancy kino pra realnych partyzanaŭ karystajecca papularnaściu. Jaho šukajuć, pierapisvajuć, ładziać siabroŭskija supolnyja prahlady. Kudzinienka stvaryŭ pryvabny padpolny pradukt — sapraŭdny tvor, sapraŭdny fakt sapraŭdnaha mastactva.

Poŭny varyjant artukułu čytajcie ŭ hazecie "Naša Niva"

Siarhiej Mikulevič

Клас
0
Панылы сорам
0
Ха-ха
0
Ого
0
Сумна
0
Абуральна
0