Žanr: bajavik, fantastyka, pryhody
Režysior: Kolin Trevarau
U rolach: Krys Prat, Brajs Dałas Chovard, Vinsent D'Anofrya, Nik Dž. Robinsan, Taj Simpkins, Amar Si, Irfan Kchan
ZŠA, 125 chv.
Adznaka: 7
Padziei adbyvajucca praz 22 hady paśla «Parku jurskaha pieryjadu» (1993). Na vostravie Nubłar funkcyjanuje park, zadumany Džonam Chemandam. Ale z časoŭ jaho adkryćcia naviedvalnaść padaje, i kampanija, jakaja vałodaje parkam, vyrašaje adkryć novy atrakcyjon, kab pryciahnuć naviednikaŭ. Hienietyki stvarajuć novy vid dynazaŭra — Indominus Reks, vykarystaŭšy hieny raptaraŭ i inšych istot. Padčas naviedvańnia valjera novaha dynazaŭra Kłer Dyrynh, dyrektarka parku, i Oŭen Hredzi vyśviatlajuć, što toj vyjšaŭ nadzvyčaj razumnym i ŭmieje padmanvać sistemy termadatčykaŭ. Niečakana vyśviatlajecca, što dynazaŭr vybraŭsia za miežy valjera…
Čaćviorty film franšyzy «Park jurskaha pieryjadu» (u asnovie — adnajmiennaja kniha amierykanskaha fantasta Majkła Krajtana) — maštabny prajekt pradziusara Styviena Śpiłbierha, jaki vystupaŭ režysioram pieršych dźviuch častak. Hetaja stužka pavinna była vyjści nieŭzabavie paśla «Parka jurskaha pieryjadu — 3» (2001), ale trapiła ŭ «vytvorčaje piekła». Zdymki pačalisia tolki ŭ krasaviku 2014 na Havajach, sabraŭšy zornuju kamandu akcioraŭ.
Pry stvareńni centra kiravańnia parkam byŭ staranna daśledavany tematyčny park studyi Universal u Arłandzie (Fłaryda). Taksama častkova dyzajniery ŭziali za asnovu dyśpietčarskuju NASA.
«Viełacyraptary — maje lubimyja, — skazaŭ Krys Prat, vykanaŭca hałoŭnaj roli advažnaha marpiecha i dresiroŭščyka nievialikich drapiežnych dynazaŭraŭ — raptaraŭ. — Ja b vybraŭ sabie samaha maleńkaha, jaki nie zmoža mnie naškodzić».
Padčas prasłuchoŭvańnia niekatorym akcioram treba było siadzieć i kryčać, prykidvajučysia, što dynazaŭr źbirajecca ich źjeści. Adnoj ź idej dla scenara filma byli sałdaty, hienietyčna skryžavanyja z dynazaŭrami. Hetaja ideja była prapanavanaja jašče ŭ 2004 hodzie, ale ad jaje admovilisia, zamianiŭšy novym, hienietyčna sprajektavanym dynazaŭram.
Kancepcyja «Jurskaha pieryjadu» nie źmianiłasia: čałaviečnaść u dačynieńni da žyvych istot zmahajecca z karyślivaściu vajskoŭcaŭ i prahaj nažyvy biznesoŭcaŭ. Film daje šaniec daviedacca, jak mahli b vyhladać najstarejšyja nasielniki Ziamli, ale ich vyhladu nie varta daviarać napoŭnicu: navukovyja fakty skažajucca dziela bolšaj vidoviščnaści.
