Z Harodni pryjšła sumnaja viestka – na 84-m hodzie žyćcia nie stała hramadskaha aktyvista, adnaho z pačynalnikaŭ haradzienskaj «Pachodni», krajaznaŭca, piedahoha, aktyvista TBM, miecenata i historyka Alaksandra Talerčyka.
Nie stała majho talenavitaha ziemlaka, ščyraha čałavieka, patryjota. Jon byŭ rodam ź vioski Parečča Słonimskaha rajona. Na Słonimščynie prajšło jaho malenstva i junactva. A potym astatniaje žyćcio jon pražyŭ u Harodni.
Alaksandr Talerčyk vielmi pieražyvaŭ za Biełaruś, za ŭsio toje, što siońnia adbyvajecca na Baćkaŭščynie. Jon dobra viedaŭ historyju svajho kraju. U 2002 hodzie vydaŭ u Harodni knihu «Parečča». U joj na asnovie adšukanych archiŭnych materyjałaŭ i asabistych uspaminaŭ pakazaŭ 450-hadovuju historyju svajoj vioski Parečča. Šmat staronak u joj adviedziena Vałovičam – byłym haspadaram Parečča. Padrabiazna i ŭpieršyniu ŭ Biełarusi apisaŭ patryjatyčnuju dziejnaść i śmierć Michała Vałoviča, aktyŭnaha ŭdzielnika paŭstańnia 1830-1831 hadoŭ. Dziakujučy Alaksandru Talerčyku na mohiłkach u vioscy Parečča byŭ adnoŭleny miemaryjalny znak, pryśviečany Vałovičam i jaho paplečnikam, jakija zahinuli ŭ baraćbie suprać Rasijskaj impieryi.
Słonimcy, haradziency i ŭsie, chto jaho viedaŭ, ščyra spačuvajuć rodnym i blizkim u suviazi sa śmierciu Alaksandra Talerčyka – jašče adnaho patryjota našaj Ajčyny.
