Delehacyja Dziarždepartamienta ZŠA ŭ składzie namieśnikaŭ pamočnika dziaržsakratara pa spravach Jeŭropy i Jeŭrazii Brydžyt Brynk i pa pytańniach demakratyi, pravoŭ čałavieka i pracy Robierta Biarščynski 17 maja prybyła ŭ Minsk.
«Delehacyja prybyła dla ŭdziełu ŭ trecim raŭndzie amierykana-biełaruskaha dyjałohu pa pravach čałavieka», — paviedamiła pres-słužba pasolstva ZŠA ŭ Biełarusi.
Vizit budzie doŭžycca da 19 maja. Zapłanavanyja sustrečy Brynk i Biarščynski ź biełaruskimi aficyjnymi asobami, pradstaŭnikami hramadzianskaj supolnaści i apazicyjnych partyj, aktyvistami pravaabarončaha ruchu.
Pieršy raŭnd dyjałohu pa pravach čałavieka prajšoŭ u listapadzie 2015 hoda padčas pieršaha vizitu ŭ Minsk Brynk i Biarščynski. Tady jany sustrelisia ź ministram zamiežnych spraŭ Uładzimiram Makiejem i adnym z savietnikaŭ u Administracyi prezidenta, a taksama z pradstaŭnikami RHA «Biełaruski Chielsinkski kamitet», zakrytaha ŭładami pravaabarončaha centra «Viasna», carkvy «Novaje žyćcio», lidarami biełaruskaj apazicyi i palityčnymi analitykami. Pavodle vynikaŭ vizitu pradstaŭniki Dziarždepartamienta zajavili, što ich dyskusii ź biełaruskimi čynoŭnikami byli «pazityŭnymi, kanstruktyŭnymi i mieli natchnialny charaktar».
Druhi raŭnd adbyŭsia ŭ śniežni ŭ Vašynhtonie. Amierykanski bok akramia Brynk i Biarščynski pradstaŭlaŭ namieśnik pamočnika administratara pa spravach Jeŭropy i Jeŭrazii Ahienctva mižnarodnaha raźvićcia ZŠA Džonatan Katc. Ad Biełarusi ŭ pieramovach udzielničali načalnik upraŭleńnia Amieryki MZS Aleh Kraŭčanka, namieśnik načalnika ŭpraŭleńnia hłabalnaj palityki i humanitarnaha supracoŭnictva MZS Iryna Vialička, časovy pavierany ŭ spravach Biełarusi ŭ ZŠA Pavieł Šydłoŭski, a taksama pradstaŭniki CVK, Ministerstva justycyi, Hienieralnaj prakuratury i Nacyjanalnaha centra zakanadaŭstva i pravavych daśledavańniaŭ. U vynikovym paviedamleńni ofisa pres-sakratara Dziarždepartamienta ZŠA adznačałasia, što baki «abmierkavali važnaść adpaviednaści parłamienckich vybaraŭ, što adbuducca ŭ nastupnym hodzie, mižnarodnym normam», a taksama nieabchodnaść zachavańnia abaviazacielstvaŭ krain — členaŭ ABSIE pa zabieśpiačeńni svabody słova, schodaŭ i asacyjacyj.
