Jeŭrapiejskaje kaśmičnaje ahienctva rychtujecca da pasadki zonda «Skijapareli» na pavierchniu Marsa.
Pasadka pavinna adbycca ŭ 14.58 pa Hrynvičy (17.58 pa Minsku) u sieradu. Kali radyjoteleskop ŭ Indyi prymie praz 9 chvilin paśla hetaha sihnał z aparata, heta budzie aznačać, što zond ščasna dasiahnuŭ pavierchni.
Madel zonda «Skijapareli». Fota JEKA
Hetaja častka prajekta «EkzaMars» ažyćciaŭlajecca Jeŭrapiejskim kaśmičnym ahienctvam u supracoŭnictvie z rasijskim Raskosmasam, jakija zabiaśpiečyli zapusk arbitalnaha aparata TGO, častkaj jakoha źjaŭlajecca pasadačny zond «Skijapareli», z dapamohaj rasijskaj ciažkaj rakiety-nośbita ŭ pačatku hetaha hoda.
U ciapierašni čas «Skijapareli» adździaliŭsia ad arbitalnaha aparata paśla padarožža ŭ 500 młn km i ŭ hetyja hadziny nabližajecca da punkta ŭklučeńnia tarmaznoha ruchavika i pierachodu da aktyŭnaha spusku ŭ marsijanskaj atmaśfiery.
«Skijapareli» źjaŭlajecca pratatypam, na jakim buduć vypraboŭvacca novyja technałohii spusku i pasadki na pavierchniu Marsa. U vypadku pośpiechu jany buduć vykarystanyja praz čatyry hady pry vysadcy jeŭrapiejskaha marsachoda.
Hety šaścikołavy aparat maje na borcie buravuju ŭstanoŭku i partatyŭnuju łabaratoryju. Jaho hałoŭnaja zadača — pošuki na Marsie śladoŭ vykapniovaha arhaničnaha žyćcia.
Hetaja ekśpiedycyja stała mahčymaściu dla JEKA pieraadoleć rasčaravańnie niaŭdačaj 2003 hoda, kali brytanski aparat «Bihl-2» ździejśniŭ miakkuju pasadku na Marsie, ale nie zdoleŭ razharnuć soniečnyja batarei i pierastaŭ funkcyjanavać.
Pry pasadcy «Bihla-2» vykarystoŭvalisia pasiŭnyja mietady ŭ vyhladzie nadzimanych amartyzacyjnych miaškoŭ. Jak padazrajuć kanstruktary, mienavita jany stali pryčynaj niaŭdačy, bo zaklinavali miechanizm raskryćcia soniečnych panelaŭ.
«Skijapareli» vykarystoŭvaje zusim inšy mietad pasadki — heta kambinacyja termaščyta, parašutnaj sistemy i rakietnych ruchavikoŭ, jakija źniziać jaho chutkaść užo la samaj pavierchni.
Apošnija dva mietry svajho šlachu zond budzie prosta padać ź nievialikaj chutkaściu, i źminalnaje dno zabiaśpiečyć jamu zachavanaść pry kantakcie z hruntam.
U ciapierašni čas śpiecyjalisty JEKA, jakija sabralisia ŭ centry kiravańnia ŭ Darmštacie, zataiŭšy dychańnie, sočać za telemietryjaj, jakaja pastupaje z borta aparata, u nadziei, što ŭ bližejšyja hadziny ŭsio projdzie dobra.
Aparat masaj u 600 kh, vyrableny ŭ asnoŭnym u Italii, u vypadku ŭdałaj pasadki zojmiecca mietearałahičnymi daśledavańniami. Jaho batarej chopić na čatyry dni pracy.
Na samaj spravie jeŭrapiejskija navukoŭcy prajaŭlajuć najbolšuju cikavaść da pracy arbitalnaha aparata TGO, jaki pavinien pierajści na arbitu vakoł Marsa praktyčna adnačasova z pasadkaj «Skijapareli».
Jon pavinien pravieści na arbicie niekalki hadoŭ, vyvučajučy dynamiku marsijanskaj atmaśfiery — vahańniaŭ u jaje składzie mietanu, vadzianoha paru i vokisu azotu. Hetyja hazy mohuć pakazvać na pryrodu tektaničnych i inšych pracesaŭ, jakija adbyvajucca na Marsie. Jany mohuć taksama być ukazańniem na najaŭnaść tam arhaničnaha žyćcia.
