Zhodna ź niadaŭna pryniatym zakonam, IP zmohuć zajmacca tolki vidami dziejnaści, jakija buduć uklučany ŭ pieralik urada. Saŭmin pavinien zaćvierdzić jaho da 1 lipienia. Pakul dakumient znachodzicca na stadyi raspracoŭki. 15 maja jaho pavinny vynieści na hramadskaje abmierkavańnie.
«Aryjentyrovačna na siońnia možna tolki kazać pra niejkija ličby z ulikam taho, što pieraliki nie zaćvierdžanyja. Na dumku Minekanomiki, pytańnie zakranie kala 40 tysiač indyvidualnych pradprymalnikaŭ», — skazaŭ Navumovič.
U ministerstvie taksama čakajuć, što transfarmacyja ź IP u jurydyčnyja asoby, jakaja budzie iści ŭ sproščanym paradku, patencyjna moža pavialičyć dachody biudžetu.
«Kali hetaja katehoryja indyvidualnych pradprymalnikaŭ umoŭna zastaniecca indyvidualnymi pradprymalnikami, havorka ŭ častcy napaŭnieńnia biudžetu budzie iści ab sumie kala 150 młn rubloŭ. Kali hetyja vidy dziejnaści transfarmujucca na siońniašni dzień u formu jurydyčnaj asoby, to taki ž subjektny skład u formie jurydyčnych asob siońnia vypłačvaje kala 440 młn rubloŭ», — rastłumačyŭ Navumovič.
Padčas pres-kanfierencyi pieršy namieśnik ministra finansaŭ Dźmitryj Kijko adznačyŭ, što za dva hady małoje pradprymalnictva ŭžo pavialičyła ŭkład u farmavańnie biudžetaŭ usich uzroŭniaŭ na 600 młn rubloŭ u vyniku padatkovych źmien.
«Budzie adbyvacca zaraz transfarmacyja indyvidualnych pradprymalnikaŭ, šerah praciahnie svaju dziejnaść, što buduć adpaviadać vidam dziejnaści, jakija źmiaščajucca ŭ pieraliku, častka budzie likvidavanaja, kali nie budzie žadańnia pierachodzić u kamiercyjnuju arhanizacyju i, adpaviedna, častka praciahnie pracu ŭ vyhladzie kamiercyjnaj arhanizacyi. My nie bačym tut niejkich značnych surjoznych nastupstvaŭ dla biudžetu ŭ častcy strat dachodu, ale i nie čakajem značnaha, praryŭnoha pastupleńnia dadatkovych srodkaŭ, tamu što nie meta hetaha zakona fiskalnyja nastupstvy», — skazaŭ Źmicier Kijko.
Čytajcie taksama:
Apublikavali źmieny ŭ zakon dla pradprymalnikaŭ. Što ŭ ich?
Čym biełaruskija pradprymalniki adroźnivajucca ad ruskich i ŭkraincaŭ
