— Ukazam prezidenta ja byŭ uznaharodžany dziaržaŭnaj uznaharodaj-miedalom «Za vyratavańnie tych, chto hinuŭ». Pa rasijskich zakonach ja vyzvaleny ad pakarańnia i ź mianie źniataja sudzimaść. Ja nie viedaju, što mienavita napisana ŭ pradstaŭleńni da ŭznaharody, ja ž radavy, nam mała što pakazvajuć. Kali niekali mnie daduć adpačynak, ja pryjedu ŭ raźmiaščeńnie našaj častki ŭ Rasii, tam jość zahad ab uznaharodžańni, tady ja daviedajusia dakładna. Tak što, siabry, radujciesia, a apanienty, kusajcie łokci — z hetaha času ja bolš nie zek, — raspavioŭ jon.
Pavodle słovaŭ režysiora, pradstavić da ŭznaharody jaho mahli za vypadak vyratavańnia kamandzira padčas adnaho z bajoŭ. Biełastocki dadaŭ, što padčas pieršaha bajavoha zadańnia praź miedpunkt, dzie jon pracuje, prajšło bolš za 300 paranienych.
Uvosień 2023 hoda Biełastocki, znachodziačysia ŭ kałonii, zaklučyŭ kantrakt ź Minabarony. Na vajnie režysior słužyć miedykam u šturmavym atradzie.
Illu Biełastockaha prysudzili da 14 hadoŭ kałonii. Sud pryznaŭ jaho vinavatym u razbeščvańni 13-hadovaha chłopčyka va ŭłasnaj kvatery ŭ Maskvie ŭ noč na 6 listapada 2018 hoda. Paśla apielacyi pakarańnie źmiakčyli da 6,5 hadoŭ. Sam režysior nastojvaŭ na svajoj nievinavataści. Za 2,5 hoda da vychadu z kałonii Biełastocki zaklučyŭ kantrakt ź Minabarony i adpraviŭsia na vajnu.
Pra toje, što režysior źjechaŭ na front, raspaviała jaho siastra ŭ pačatku śniežnia 2023 hoda. Tady jon zajaviŭ, što takim čynam choča «viarnuć svaim rodnym mahčymaść im hanarycca» i adkazać usim, chto jaho «praklinaŭ».
