Kandydaty ŭ KR. Fota: «Biełsat», skryn videa «OU», telehram-kanał Łatuški
Całkam 12 śpisaŭ apublikavany tut.
Jak źbirałasia kamanda Łatuški
U Paŭła Łatuški atrymaŭsia samy vialiki śpis — 46 čałaviek.
«My razam ź Juryjem Hubarevičam u kamandzie Narodnaha antykryzisnaha ŭpraŭleńnia z 2020 hoda. I tamu łahična, što naša kaalicyja była stvorana mienavita z členaŭ NAU razam z rucham «Za Svabodu», jaki ŭznačalvajuć Juryj Hubarevič i Aleś Michalevič. My supracoŭničajem užo daŭno i davoli efiektyŭna z asacyjacyjaj palitviaźniaŭ «Da Voli». Jaje pradstaŭniki taksama stali łahičnymi kaalicyjantami», — tłumačyć Łatuška.
Pavieł Łatuška z dačkoj Janaj, jakaja taksama bałatujecca ŭ jaho kamandzie. Fota: telehram-kanał Łatuški
Kali paplečniki pa NAU i kupałaŭcy (Ihar Sihoŭ, Aleh Harbuz) u śpisie zrazumiełyja, to niekatoryja asoby niečakanyja. Naprykład, błohier Arciom Šaparaŭ i režysior Andrej Kurejčyk.
«Z Andrejem Kurejčykam ja znajomy jašče z časoŭ, kali byŭ ministram kultury. My razam uvajšli ŭ skład pieršaj Kaardynacyjnaj rady.
Ja viedaju jaho krytyčnaje staŭleńnie da druhoha składu KR. Jon jakraz-taki vystupaje taksama za baraćbu. Tym bolš, nakolki ja viedaju, jaho aŭdytoryja prahałasavała za toje, što padtrymaje śpis, jaki ja inicyjavaŭ. Tamu całkam łahična, što jon u našym śpisie», — kaža Łatuška.
Z Šaparavym, dadaje jon, jany taksama supracoŭničali raniej.
Naziralniki tłumačać, čamu ŭ Łatuški taki vialiki śpis.
«Zrazumieła, Pał Pałyč choča mieć bolšaść u KR (ahułam heta 80 čałaviek). U vypadku kali Pał Pałyč nabiraje bolš za 50% hałasoŭ, treba, kab u jaho było dastatkova ludziej, jakimi jon moža napoŭnić hetu svaju bolšaść».
«Dla Łatuški važna było zrabić jak možna bolš šyroki śpis, kab pakazać siłu, padniać svoj status. Chutčej za ŭsio, jon zaprašaŭ usich, z kim u kantakcie. Vidavočna, što ŭvieś śpis trymajecca na mocnaj fihury Łatuški, ale nie fakt, što ŭsie ludzi, jakija zapisalisia, płanujuć pracavać u Kaardynacyjnaj radzie. I tym bolš ciažka ŭjavić, što navat unutry śpisu jany zmohuć damovicca», — dzielicca inšy čałaviek.
Što abjadnała Jahorava i Prakopjeva
Andrej Jahoraŭ (ciapierašni śpikier KR) hanarycca, što ŭ ich kamandzie biełarusy z 15 krain: «Heta zrez paśpiachovaj, kreatyŭnaj i mahutnaj dyjaspary biełarusaŭ: ad dobraachvotnikaŭ da ekśpiertaŭ u halinie zdaroŭja i adukacyi, ad śpiecyjalistaŭ pa kibierbiaśpiecy i jurystaŭ da dvuchrazovaj čempijonki śvietu. Heta ŭžo toje, da čaho my imkniemsia, ale pakul u minijaciury. A imkniemsia my pabudavać upłyvovuju biełaruskuju dyjasparu, jak heta ŭdałosia zrabić, naprykład, armianam ci jaŭrejam».
«Minułyja čatyry hady pakazali, što bieź źmienaŭ u stratehii i padychodach biełarusy jak unutry krainy, tak i za jaje miežami buduć stanavicca bolš uraźlivymi, niahledziačy na šmatlikija sustrečy z zamiežnymi palitykami i listy ŭ mižnarodnyja instancyi», — dadaje jon.
Čamu jany syšlisia z Vadzimam Prakopjevym? Padajecca, heta vielmi roznyja ludzi.
Vadzim Prakopjeŭ u mierčy da vybaraŭ u KR. Skryn efiru «Obyčnoho utra»
«Tamu što, niahledziačy na rozny bekhraŭnd, bačym hulniu adnolkava, — tłumačyć Prakopjeŭ. — Bačym, što subjekta niama. Vokny mahčymaściaŭ praśpim.
Jahoraŭ taki ž pasijanaryj, ale kali ja intuityŭny i vynachodlivy, to jon intelektualna i mietadałahična mocny. Škoła Mackieviča. Dapaŭniajem adzin adnaho. Perfect combination».
«Jany vielmi roznyja, i dziŭna było ich bačyć na supolnych videa, — razvažaje adzin z naziralnikaŭ. — Prakopjeŭ maje imia i paznavalnaść, a Jahoraŭ maje ludziej i sietku NDA. Imia Prakopjeva dazvalaje Jahoravu pravieści bolš ludziej u Kaardynacyjnuju radu, što dazvolić zachavać upłyŭ i niejki kantrol nad KR».
«U ich pamiž saboj niadrennaja kamunikacyja. Vadzim lubić razumnych ludziej, a Andrej — charyzmatyčnych. I Jahoravu atrymałasia ŭhavaryć Prakopjeva, bo toj pačatkova nie chacieŭ iści na hetyja vybary. Jahoraŭ prynosić ludziej, dapamahaje sa stratehijaj, a Prakopjeŭ pa płanie dapamahaje z bačnaściu»,
— prahučała jašče adno mierkavańnie.
Śpis za Cichanoŭskuju?
U kamandzie Alaksandra Dabravolskaha častka ludziej — sa struktur Cichanoŭskaj (Alina Koŭšyk, Stanisłava Hlińnik).
Alaksandr Dabravolski. Fota: «Naša Niva»
Zaprasili taksama režysiora Mikałaja Chalezina.
«Heta była naša inicyjatyva. Chalezin — asoba, jakaja zaniataja roznymi kreatyŭnymi spravami pa prasoŭvańni biełaruskaj kultury, dziejač jeŭrapiejskaha ŭzroŭniu», — tłumačyć Dabravolski.
Jon kaža, što ich abjadnoŭvaje nie asoba Cichanoŭskaj, a ideja — pryvieści Biełaruś u siamju jeŭrapiejskich narodaŭ.
«Nam časam prapanoŭvajuć pačać z nula ludzi, jakija nie ŭdzielničali ŭ pracy. My ličym, što heta marnatraŭstva i nierazumieńnie.
Biełaruskaje hramadstva jašče nie padrychtavanaje, kab heta pryniać, ale palityčnaje lidarstva — heta prapanova pierśpiektyvy i alternatyvy, a nie tolki pytańnie «čaho vašaj łascy?». I časam ty prapanuješ alternatyvu, da jakoj nie hatovy».
Naziralniki ž traktujuć situacyju krychu inakš.
«Chutčej za ŭsio, hety śpis budzie adstojvać pazicyi Cichanoŭskaj i ŭraŭnavažvać haračych i ambitnych Łatušku i Prakopjeva», — ličyć adzin z apytanych.
«Śpis farmavaŭsia ŭ apošni momant i davoli chaatyčna. Kali Franak [Viačorka] zrazumieŭ, što ŭsie śpisy, jakija iduć, patencyjna mohuć być u apazicyi da Śviatłany Cichanoŭskaj ci staviacca krytyčna da Franaka asabista, to pačałosia terminovaje składańnie śpisu ŭ padtrymku Ofisa-Kabinieta»,
— dzielicca adzin z surazmoŭcaŭ.
Jak Azaraŭ paklikaŭ Cimanoŭskuju
U śpisie Alaksandra Azarava jość publičnyja i niepubličnyja ludzi z «Bajpoła», byłyja vajskoŭcy i palitviaźni. A jak tam akazałasia biahucha Kryścina Cimanoŭskaja?
«My prosta asabista znajomyja. Ja dapamoh joj pa asabistym pytańni», — kaža Azaraŭ.
Cimanoŭskuju (jak i astatnich u śpisie) jon zaprasiŭ asabista.
Alaksandr Azaraŭ. Fota: «Naša Niva»
«Za niekalki dzion da kanca farmavańnia śpisaŭ tolki daviedaŭsia, što možna nie 10 čałaviek, a bolš. I ŭsie źbirajuć bolš», — Azaraŭ raskazvaje, jak u śpiešcy šukaŭ ludziej.
«My praviarali kožnaha, kab ludzi byli dastojnyja», — Azaraŭ udakładniaje, što praviarali biez palihrafa.
Jon skardzicca: byli vypadki, što ludziam ź jaho śpisu telefanavali i ŭhavorvali adpisacca. «Nie budu nazyvać chto».
Prahrama Azarava źviazana z pravaparadkam, u joj, naprykład, — stvaryć zakon ab lustracyi.
Čamu ŭ Turarbiekavaj svaja kamanda
Roza Turarbiekava kaža, što ŭ asnovie jaje kamandy — paplečniki pa frakcyi «Naša sprava», jakaja raniej była ŭ KR. A taksama dałučylisia dva paramiedyki, jakija byli va Ukrainie (adna ź ich — Nastaśsia Machamiet).
Roza Turarbiekava. Fota: «Biełsat»
«Našy pryncypy i mety supadajuć jašče tamu, što Nastaśsia Machamiet, Alaksandr Paršankoŭ i ja prymali ŭdzieł u stvareńni jačejek niezaležnych prafsajuzaŭ u BDU i mieduniviersitecie», — dzielicca Roza.
Paramiedyki ŭ kamandzie chočuć stvaryć instytut dapamohi dla dobraachvotnikaŭ, jakija demabilizavalisia.
Kamanda zbolšaha abjadnoŭvaje vykładčykaŭ i mahistrantaŭ. Z palityčnych dziejačaŭ tam Vital Rymašeŭski. Turarbiekava tłumačyć, čamu ź im abjadnalisia.
«Viedaju jaho dastatkova daŭno, da 2020 hoda pierasiakalisia na roznych dyjałohavych placoŭkach. Vielmi dapamoh, kali ja vymušana była biehčy ź Biełarusi ź siamjoj. Vital dapamoh taksama stvaryć Biełaruskuju asacyjacyju adukacyi i navuki, jakaja zarehistravana ŭ Litvie».
Čamu Roza idzie asobnaj kamandaj? Jana kaža, što tak skłałasia ad pačatku, u jaje svaje pryncypy.
«Mnie rabilisia prapanovy, ale nie stanu ahučvać śpis».
Roza dadaje, što paśla taho, jak na siabroŭ KR stali zavodzić zavočnyja kryminalnyja spravy i cisnuć na svajakoŭ u Biełarusi, achvotnych iści ŭ KR stała mieniej.
«Turarbiekava — samastojnaja fihura. Jana časta źjaŭlajecca ŭ presie, nie maje za saboj niehatyŭnaha šlejfu,
— tłumačyć adzin z našych surazmoŭcaŭ. — Dziŭna było ź joj u śpisie pabačyć Vitala Rymašeŭskaha. Kali Turarbiekava kanstruktyŭnaja, to Rymašeŭski pastajanna šukaje kanflikty».
Kamanda błohieraŭ, kalinoviec «Kuś» i Markiełaŭ
Błohier Alaksandr Kabanaŭ dzielicca, što ŭ ich błohierskaj tusoŭcy spačatku abmiarkoŭvałasia, ci ŭdzielničać naohuł. I pakul hetaje abmierkavańnie išło, niekatoryja dałučylisia da inšych kamand (naprykład, Arciom Šaparaŭ i Siarhiej Biaspałaŭ).
Alaksandr Kabanaŭ. Fota: «Naša Niva»
Kabanaŭ abiraŭ, kaho zaprasić u kamandu, a paralelna da tych ža ludziej pryhladaŭsia kalinoviec Vadzim Kabančuk. Tamu jany vyrašyli abjadnać śpisy. Ale sam Kabančuk u vyniku nie moža ŭdzielničać (takija praviły ŭ Pałku Kalinoŭskaha), zamiest jaho budzie były dobraachvotnik Alaksandr Kłačko («Kuś»).
Byŭ varyjant abjadnacca ź ludźmi ŭ kamandzie błohiera Maksima Šabuckaha, ale niekatorych kandydatur adtul Kabanaŭ nie chacieŭ bačyć u siabie.
Błohier Siarhiej Piatruchin, jaki raniej krytykavaŭ KR jak niepatrebnuju strukturu, taksama abirajecca.
«Ja jamu patłumačyŭ, čym tam možna zajmacca, — kaža Kabanaŭ. — Ale jon ličyć, što biez vajskovaj siły pieramieny małaimaviernyja, jon suprać pieramoŭ z režymam.
Čamu ŭ śpisie Piatro Markiełaŭ? Heta Kabančuk zaprašaŭ».
Ahułam Kabanaŭ krytykuje sistemu śpisaŭ i nazyvaje heta machlarstvam. Ličyć, što za hetyja śpisy i kvoty vystupali tyja, chto razumieŭ, što piersanalna za ich nichto nie prahałasuje.
«Niekatoryja ŭžo pakazali, što ŭ KR ničym nie zajmalisia. Biełaruskija čynoŭniki — tolki z advarotnaha boku».
Čytajcie taksama:
Da vybaraŭ u KR u kamandzie Prakopjeva-Jahorava raspracavali ceły firmovy harderob — jak vam?
Mahiloŭskaja kaardynatarka Statkieviča stukała na Palčysa. A ciapier lezie ŭ Kaardynacyjnuju radu
