Takoje palityčnaje rašeńnie pryniaŭ CHIII źjezd Abjadnanaj hramadzianskaj partyi ŭ niadzielu.
Anatol Labiedźka. Fota Radyjo «Svaboda»
Jość takaja staraja biełaruskaja tradycyja — partyja atrymlivaje pamiaškańnie dla źjezda tolki ŭ samy apošni momant. Tak było z BNF, z PKB, tak na hety raz atrymałasia i z Abjadnanaj hramadzianskaj partyja. Zrešty, sioleta atrymałasia pravieści schod u Pałacy kultury MTZ, a dva hady nazad delehatam davodziłasia źmiaščacca ŭ ciesnym, ale haścinnym, pamiaškańni Siadziby BNF.
Zrešty, całkam dla źjezda pamiaškańnie tak i nie vydzielili. U niadzielu ŭ pałacy prachodziŭ «Miadovy kirmaš». Usie ž palityčnyja žarści prachodzili niedzie ŭ hłybini budynku, za jatkam ź miodam i «pravasłaŭnymi travami».
Na scenie visieŭ vializny płakat, dzie byli fatahrafii 33 siabroŭ partyi. Što adrazu kinułasia ŭ vočy, dyk hetaja mała kolkaść žančyn na hetym fota. Łozunham ža hetaha źjezda byŭ: «Stvarajem novaje, zachoŭvajem lepšaje».
Nu i kali pišaš pra niejkuju padzieju z pałaca MTZ, to niemahčyma nie zhadać vializny čyrvona‑zialony ściah, što visić nad scenaj. Ahepisty byli źniali jaho, ale potym niejki tavaryš z administracyi budynka paviesiŭ jaho na miesca, stroha zabaraniŭšy lubuju samadziejnaść.
Kali ŭžo ŭspomniŭ minuły źjezd AHP, to tady šmat havaryłasia ab niedachopach, krytykavałasia kiraŭnictva, ciapier ža asnoŭnaj temaj vystupaŭ byli miascovyja vybary. Kiraŭnictva partyi vystupała za sychod AHP z vybarčaj honki. Rehijanalnyja aktyvisty ŭpiralisia — im karcić prajści kampaniju da kanca.
Staršynia AHP Anatol Labiedźka rastłumačyŭ, čamu jon vystupaje za spynieńnie ŭdziełu ŭ vybarach. Najpierš jon havaryŭ pra toje, što amal usie siabry AHP nie byli ŭklučanyja va ŭčastkovyja vybarčyja kamisii. Praciahvajucca tyja ž parušeńni vybarčaha zakanadaŭstva, što byli i raniej.
«Pa takich samych praviłach buduć prachodzić i prezidenckija vybary, — zaznačyŭ A.Labiedźka. — A potym u nas zapytajucca, čamu my zhadzilisia ŭdzielničać u miascovych».
Labiedźka pierakanany, što ŭ miascovyja saviety trapić 20‑30 apazicyjanieraŭ, jakija buduć pryznačanyja, a nie abranyja.
Namieśnik staršyni Leŭ Marholin taksama za źniaćcio. «Ludzi pabačać, što choć niechta nie pajšoŭ na pavadku va ŭłady», — zaznačyŭ jon. Padtrymaŭ admovu ad udziełu i Vasil Palakoŭ z Homiela.
Tym nie mienš, bresckaja, minskaja i hrodzienskaja abłasnyja arhanizacyi, a taksama minskaj haradskaja vystupili za ŭdzieł. Padtrymaŭ ich i jašče adzin namieśnik Labiedźki — Jarasłaŭ Ramančuk.
Lider «Maładych demakrataŭ» Michaś Paškievič zaznačyŭ, što bolšaść siabroŭ AHP pajšło na vybary nie šlacham zboraŭ podpisaŭ, a praz partyjnaje vyłučeńnie.
Na jahonuju dumku, AHP navat ciapier vyhladaje na vybarach horš za Ruch «Za Svabodu», a kali zaraz adbudziecca źniaćcio z honki, to «partyja zastaniecca biez vybaraŭ uvohule».
Alaksandr Vaŭčanin z Žodzina ćviorda skazaŭ, što pojdzie da kanca, bo nie moža padmanuć svaich vybarcaŭ, ale heta apošnija jahonyja vybary. Uładzimir Źviernik z Čyści idzie pa biezalternatyŭnaj akruzie. Jon taksama nie choča sychodzić.
Urešcie było pryniataje palityčnaje rašeńnie nie ŭdzielničać u miascovych vybarach, tym nie mienš, zrabić vyklučeńnie dla «haračych hałovaŭ», jakija prahnuć zmahańnia.
Darečy, biełaruskaj movy na źjeździe było mała. Joj karystalisia tolki viadučyja Alaksandr Dabravolski i Zinaida Bandarenka, a taksama Anatol Labiedźka ź Michaiłam Paškievičam. Inšyja pramaŭlali pa‑rasiejsku.
Mižnarodny sakratar Andrej Dźmitryjeŭ havaryŭ pra toje, što AHP musić być bližej da BNF. Dźvie hetyja partyi zmohuć udała dapaŭniać adno adnu. «U BNF jość prahrama nacyjanalnaha adradžeńnia, kultury, u nas jość ekanomika. U budučyni my možam vyjści na novuju kansiervatyŭnuju partyju», — zaznačyŭ jon.
Michaś Paškievič ź ironijaj usprymaŭ słovy pra mahčymy rejderski zachop ułady ŭ AHP. A taksama havaryŭ pra niemahčymaść AHP pravieści paŭnavartasnuju prezidenckuju kampaniju. Jon prapanoŭvaŭ zasiarodzicca na drabniejšych zadačach, ale jakija lahčej vyrašyć.
Jarasłaŭ Ramančuk u svaim vystupie adznačyŭ, što mnohija mižnarodnyja arhanizacyja prosta «skurvilisia». U pryvatnaści, jon uzhadvaŭ MVF, Suśvietny bank, jaki dajuć kredyty biełaruskim uładam.
Leŭ Marholin kazaŭ pra nie zusim čystapłotnuju dziejnaść Viktara Karniajenki, jaki źjaŭlajecca siabram AHP i druhim čałaviekam u Ruchu «Za Svabodu».
Labiedźka taksama haniŭ Ruch i Milinkieviča. U pryvatnaści, jon havaryŭ pra toje, što Milinkievič paŭsiul u Jeŭropie havoryć pra lehimityzacyju ŭłady Łukašenki.
Źjezd pryniaŭ rašeńnie pryznać dziejnaść kirujučych orhanaŭ za minułyja dva hady zdavalniajučaj.
Kali pryjšła čarha vyłučeńnia na staršyniu, to akazałasia, što alternatyvy ŭ Anatola Labiedźki niama. Barysaŭski pradprymalnik Viktar Harbačoŭ uziaŭ samaadvod. «Mnie nie chapaje siłaŭ, srodkaŭ i duchu, kab uznačalić partyju», — zaznačyŭ jon.
U vyniku za Labiedźku prahałasavała 89 čałaviek sa 109, što składaje 81,6%. Suprać — 17 čałaviek (15,6%).
Heta ŭžo šosty termin dla Labiedźki na čale partyi. Alternatyvy niama, jak skazaŭ kiraŭnik Mahiloŭskaj abłasnoj arhanizacyi Uładzimir Šancaŭ.
«Nie ŭsio było prosta. Možna šmat havaryć chto kamu rabiŭ jakija prapanovy. Niekatorym kaleham pa demakratyčnym łahieru možna nie padavać ruku», — zaznačyŭ znoŭ abrany staršynia.
Jahonymi namieśnikami znoŭ abranyja Jarasłaŭ Ramančuk i Leŭ Marholin.
Cikava, što na źjeździe amal zusim nie havaryłasia pra prezidenckija vybary. «Niama resursu», — jak pravatna adznačyŭ adzin z delehataŭ.
