«Biełnaftachim» pryznaŭ pavyšeńnie cenaŭ na paliva 1

Kancern «Biełnaftachim» aficyjna abjaviŭ pra pavyšeńnie z 3 sakavika cenaŭ na bienzin i dyzielnaje paliva.

Rost koštu naftapraduktaŭ skłaŭ ad 4,5% (bienzin AI-92) da 10,5% (dyzpaliva). Rašeńnie pryniata «ŭ adpaviednaści z rašeńniem kamisii pa pytańniach impartu enierharesursaŭ pry Saviecie ministraŭ».

Z 3 sakavika 2011 hoda roźničnyja ceny na naftapradukty, jakija realizujucca praz AZS, składajuć (za 1 litr):

bienzin Narmal-80 — 2.400 rubloŭ (było 2.250), bienzin AI-92 — 3.000 (2.870), bienzin AI-95, AI-95-Jeŭra — 3.400 (3.240), dyzielnaje paliva — 2.850 (2.580).

«Źmieny cen na naftapradukty, jakija realizujucca na ŭnutranym rynku, vyklikanyja rostam suśvietnych cen na naftu i pavieličeńniem stavak akcyzaŭ na padakcyznyja naftapradukty, u suviazi z čym efiektyŭnaść realizacyi naftapraduktaŭ na ŭnutranym rynku značna pahoršyłasia», — havorycca ŭ paviedamleńni.

«Biełnaftachim» pryvodzić statystyku, pavodle jakoj kaciroŭki nafty za studzień-luty 2011 hoda vyraśli na 13,5%, za maj 2010 hoda (tady adbyłosia papiaredniaje pavyšeńnie cen na ŭnutranym rynku) — luty 2011 hoda — na 37%.

Z 1 studzienia 2011 hoda staŭki akcyzu na padakcyznyja naftapradukty praindeksavany na 8%.

Kancern źviartaje ŭvahu spažyŭcoŭ, što «ŭ suviazi ź nieŭradžajem u 2010 hodzie rapsu i značnym skaračeńniem abjomu vytvorčaści rapsavaha masła z 3 sakavika 2011 hoda časova spyniena realizacyja praz AZS bijadyzielnaha paliva». «U suviazi z takimi anamalnymi ahramietearałahičnymi ŭmovami» vałavy zbor alejnaha nasieńnia rapsu ŭ krainie skłaŭ 374,3 tys. ton suprać 610,8 tys. u 2009 hodzie.

«Deficyt masła rapsavaha techničnaha dla vytvorčaści bijadabaŭki da paliva (mietyłavych efiraŭ tłustych kisłot) u arhanizacyjach kancerna składzie, pavodle papiarednich padlikaŭ, bolš za 50% patrebnaści», — adznačajecca ŭ paviedamleńni.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH