ААТ «Беларуськалій» выключана са складу Беларускага дзяржаўнага канцэрна па нафце і хіміі.
Гэта прадугледжана пастановай Савета міністраў № 177 ад 28 лютага 2014 года, апублікаванай на Нацыянальным прававым інтэрнэт-партале.
Яшчэ адной пастановай урада, № 178 ад 28 лютага 2014 года, прадстаўнікамі дзяржавы ў органах кіравання «Беларуськалія» прызначаны міністр эканомікі Мікалай Снапкоў, старшыня Дзяржаўнага камітэта па маёмасці Георгій Кузняцоў, намеснік міністра фінансаў Максім Ермаловіч, намеснік міністра замежных спраў Аляксандр Гур'янаў.
ААТ «Беларуськалій» з'яўляецца адным з найбуйнейшых вытворцаў і экспарцёраў калійных угнаенняў у свеце. Паводле даных Міжнароднай асацыяцыі ўгнаенняў, на яго долю прыпадае сёмая частка сусветнага аб'ёму вытворчасці калійных угнаенняў.
