Вайсковыя пракуроры ў Днепрапятроўску дапытваюць вышэйшае кіраўніцтва Узброеных сіл Украіны ў ходзе расследавання падзей у Ілавайску Данецкай вобласці.
Пра гэта паведаміў генеральны пракурор Віталь Ярэма журналістам у Кіеве ў сераду.
«Цяпер у Днепрапятроўску працуюць ваенныя пракуроры, дапытваюць, у прыватнасці, Віктара Мужэнку (начальніка Генеральнага штаба), Пятра Літвіна (камандуючага войскамі Паўднёвага аператыўнага камандавання) і кіраўніцтва Узброеных сіл вышэйшага эшалона», — сказаў ён.
Генпракурор нагадаў, што вайсковыя пракуроры вядуць расследаванне абставінаў гібелі вялікай колькасці вайскоўцаў у «катле» пад Ілавайскам.
Паводле яго слоў, у баі пад Ілавайскам загінулі не менш за 200 украінскіх байцоў.
«Не менш за 200 чалавек загінулі пад Ілавайскам», — сказаў Ярэма, адказваючы на ўдакладняючае пытанне журналістаў.
Як вядома, у канцы жніўня каля Ілавайска некалькі сотняў байцоў сіл АТА трапілі ў акружэнне баевікоў і расійскіх вайскоўцаў.
Абстрэл і палон украінскіх вайскоўцаў і байцоў добраахвотніцкіх батальёнаў працягваліся больш за тыдзень.
