Фота: Громадське ТБ
Растоўскі суд абвесціць прысуд па справе ўкраінскага рэжысёра Алега Сянцова 25 жніўня.
Пракуратура прасіла прысудзіць яго да 23 гадоў пазбаўлення волі ў калоніі строгага рэжыму. Для другога абвінавачанага па гэтай справе, Аляксандра Кольчанкі, пракуратура папрасіла 12 гадоў калоніі.
Самі падсудныя віну прызнаць адмовіліся. Сянцоў у ходзе працэсу заявіў, што не лічыць суд легітымным, а таксама абвінаваціў супрацоўнікаў расійскіх спецслужбаў у выбіванні з яго прызнальных паказанняў. Сваю крымінальную справу рэжысёр назваў палітычнай і сфальсіфікаванай.
Паводле версіі следства, з красавіка па май 2014 года Сянцоў і яго прыхільнікі падпалілі ў Сімферопалі офісы грамадскай арганізацыі «Руская абшчына Крыму» і мясцовага аддзялення партыі «Адзіная Расія». Акрамя таго, сцвярджае следства, яны планавалі падарваць ў Крыме помнік Леніну.
Яшчэ двое фігурантаў справы — Генадзь Афанасьеў і Аляксей Чырный — ужо асуджаныя на сем гадоў кожны.
