Аляксандр Лукашэнка 26 красавіка прыме ўдзел у мерапрыемствах, прысвечаных чарговай гадавіне аварыі на Чарнобыльскай АЭС.
Кіраўнік дзяржавы з прэзідэнтам Украіны Пятром Парашэнкам наведаюць атамную станцыю і размешчаныя побач з ёй аб'екты. Асноўная ўвага будзе нададзена работам па падтрыманні на належным узроўні радыяцыйнай бяспекі, што непасрэдным чынам закранае інтарэсы жыхароў абедзвюх краін. Плануецца, што прэзідэнты азнаёмяцца з будаўніцтвам новага бяспечнага ахоўнага збудавання і захоўваннем адпрацаванага ядзернага паліва, ушануюць памяць ліквідатараў і пацярпелых у выніку аварыі.
У гэты ж дзень Аляксандр Лукашэнка і Пятро Парашэнка правядуць перамовы на тэрыторыі Беларусі. Кіраўнікі дзяржаў абмяркуюць шырокі комплекс пытанняў двухбаковага супрацоўніцтва, перш за ўсё ў гандлёва-эканамічнай сферы, а таксама пытанні палітычнага ўзаемадзеяння, міжнародны парадак дня і далейшыя намаганні па мірным урэгуляванні канфлікту на паўднёвым усходзе Украіны.
