Фота Волі Афіцэравай
Міністр унутраных спраў Ігар Шуневіч не выключае дэкрыміналізацыі злачынстваў па самых лёгкіх частках «наркатычнага» 328 артыкула Крымінальнага кодэкса. Пра гэта ён заявіў, адказваючы на пытанне Еўрарадыё.
«Трэба разглядаць комплексна: з аднаго боку, наркапагроза, а з іншага - пагроза для нашай краіны. Мы ж разумеем, што ўсё гэта нашы людзі. І проста аднабока падыходзіць да разгляду гэтай праблемы мы не маем права. Бо ёсць розныя меркаванні, і мы павінны гэтыя меркаванні ўлічваць у сваёй працы. Таму, заканадаўца, хутчэй за ўсё, нейкія карэктывы ў адпаведны артыкул унясе», — сказаў Шуневіч.
Па словах міністра, калі дэкрыміналізацыя наркатычнага артыкула адбудзецца, то ў дачыненні да «тых, хто патрапіў пад санкцыі папярэдняга закона, будзе прыменены больш мяккі закон і, магчыма, гэта закране і тэрміны знаходжання ў месцах пазбаўлення волі, і іншыя віды пакарання».
Калі гэтая дэкрыміналізацыя магчымая, міністр асабліва падкрэсліў, што МУС «выконвае закон, а не піша яго».
Сёння артыкул 328 Крымінальнага кодэкса «Незаконны абарот наркатычных рэчываў» прадугледжвае ад 2 да 25 гадоў у залежнасці ад цяжкасці здзейсненага злачынства. Пра тое, што цяпер у Беларусі абмяркоўваецца магчымасць дэкрыміналізацыі злачынстваў па самых лёгкіх частках артыкула 328, журналістам распавёў намеснік начальніка галоўнага ўпраўлення па наркакантролі і супрацьдзеянні гандлю людзьмі крымінальнай міліцыі МУС Андрэй Саладоўнікаў. Хоць і заўважыў, што «што заканадаўства ў дачыненні да наркотыкаў дасканалае на сённяшні дзень».
