7 красавіка на аўтамабільнай стаянцы па вуліцы Ракаўскай маладыя людзі нападпітку збілі мужчыну з-за паркавальнага месца, паведамляе ГУУС Мінскага гарвыканкама.
Мужчына разам са сваёй дзяўчынай заехаў на стаянку. Убачыў, што адзін з аўтамабіляў займае два паркавальныя месцы, і падышоў да кіроўцы, папрасіў вызваліць адно месца для сваёй машыны. Гутарка не атрымалася: пасажыр аўто выбег з транспартнага сродку і ўдарыў мужчыну некалькі разоў. Праз некаторы час «на дапамогу» сябру з машыны выбег яшчэ адзін пасажыр, які таксама ўдарыў мужчыну некалькі разоў у спіну. Зламыснікі пакінулі месца здарэння, але неўзабаве былі затрыманыя супрацоўнікамі сталічнай міліцыі.
У дачыненні да маладых людзей распачата крымінальная справа па ч.2 арт.339 КК Рэспублікі Беларусь («Хуліганства»). Ім пагражае максімальнае пакаранне ў выглядзе пазбаўлення волі на тэрмін да шасці гадоў.
