Фота СК
17 кастрычніка ў мінскім аэрапорце прайшла перадача 21-гадовага жыхара Гродна, які два гады хаваўся ў ЗША ад крымінальнага пераследу. Беларуса вярнулі на радзіму па дамоўленасці з ФБР, паведамляе Следчы камітэт.
Дэпартаваны беларус яшчэ ў чэрвені 2015 года быў асуджаны ў Гродне за незаконны абарот псіхатропных рэчываў. Але гэта яго не спыніла, кажуць следчыя.
Па матэрыялах справы, у маі 2016 года хлопец набыў псіхатропнае рэчыва праз «закладку», а на наступны дзень яго затрымала міліцыя. Падчас расследавання хлопец збег, яго аб'явілі ў вышук па лініі Інтэрпола.
Завочна яму выставілі абвінавачванне ў абароце рэчываў і ўхіленні ад адбыцця пакарання (абмежаванне волі). Тым часам прадавец псіхатропаў быў асуджаны.
А ў жніўні 2017-га мужчына трапіў у рукі паліцыі штата Фларыда - ужо за здзяйсненне махлярства. Амерыканскі бок пагадзіўся выдаць яго на радзіму: па-першае, зімой было падпісана пагадненне аб супрацоўніцтве паміж СК і ФБР, па-другое, дзеянні з псіхатропнымі рэчывамі прызнаюцца крымінальнымі і ў Амерыцы.
