Новы прэм'ер-міністр Брытаніі Барыс Джонсан і яго каханка купілі ўтульны домік у зацішным кутку Лондана. Гэта здарылася зусім нядаўна, бо суседзі расказалі журналістам газеты «Дэйлі мэйл», што 31-гадовая Кары Саймандз на мінулым тыдні разам са сваёй мамай завозіла туды мэблю.
Так выглядалі інтэр'еры дома на момант продажу.
Трохпавярховы дом у віктарыянскім стылі з відам на парк у паўднёвай частцы Лондана каштаваў 1,3 млн фунтаў стэрлінга (гэта каля 3,3 мільёна беларускіх рублёў). Яго плошча складае каля 185 квадратаў, у ім чатыры спальні плюс вялікая гасцёўня.
Так выглядалі інтэр'еры дома на момант продажу.
Так выглядаў дворык дома на момант продажу.
Цікава, што палітычныя праціўнікі Джонсана зрэагавалі імгненна: у навакольным парку нехта развешаў плакацікі з надпісам «Як суседа мы яго перацерпім, але як прэм'ер-міністра — ні за што!»
У навакольным парку нехта развешаў плакацікі з надпісам «Як суседа мы яго перацерпім, але як прэм'ер-міністра — ні за што!»
55-гадовы Джонсан адметны сваім нестандартным стылем паводзін, які выбіваецца з кансерватыўнай традыцыі ўласнай партыі. Яго ненавідзіць еўрапейскі істэблішмент — ён быў адным з матораў Брэкзіту, затое яго цэніць прэзідэнт ЗША Дональд Трамп.
Людзі ў квартале, мякка кажучы, не ў захапленні ад новага суседа, бо адчуваюць, што гэта адаб'ецца на іх спакоі. Гэта ў Беларусі жыхары радуюцца, што ў іх на вуліцы з'явіцца якасны асфальт, чыстыя кантэйнеры для смецця і прыгожыя клумбы, калі туды пераселіцца старшыня райвыканкама, у Лондане ўсё гэта і так ёсць ва ўсіх.
Джонсан развёўся са сваёй папярэдняй, другой жонкай год таму пасля 25 гадоў шлюбу і сышоўся з нашмат маладзейшай за яго Кары Саймандз.
Дом, у якім Джонсан жыў разам з другой жонкай, яны цяпер прадаюць, просяць за яго 3,75 мільёна фунтаў.
Жанчына Джонсана на 24 гады маладзейшая за яго.
З Саймандз яны да таго жылі на здымнай кватэры. У мінулым месяцы суседзі там выклікалі паліцыю, бо пачулі скандал і крыкі. Ахоўнікі парадку былі нямала здзіўленыя, калі ў кватэры знайшлі кандыдата ў прэм'еры.
У Джонсана ці то пяць, ці то шэсць дзяцей ад некалькіх жанчын, прычым дзіця ад другой жонкі нарадзілася праз сем тыдняў пасля разводу з першай, а падчас другога шлюбу нарадзілася яшчэ і пазашлюбнае дзіця, а можа быць, і двое. Джонсан намагаўся забараніць СМІ публікаваць артыкул пра сваю пазашлюбную дачку, але суддзя пастанавіў дазволіць публікацыю з фармулёўкай: «людзі маюць права ведаць пра яго неразважлівыя паводзіны». Вось такі кансерватар стаў новым кіраўніком Брытаніі.