Здарэнне адбылося апоўначы 6 студзеня на вуліцы Лібава-Роменскай. У міліцыю звярнуўся мужчына, які распавёў, што невядомы мужчына спрабуе трапіць у яго дом ды пагражае нажом, паведамляе сталічная міліцыя.
На месца здарэння неадкладна выехалі супрацоўнікі патрульна-паставой службы і дэпартамента аховы. Яны затрымалі каля названага дома 44-гадовага мужчыну.
Высветлілася, што затрыманы — таксіст. Напярэдадні раніцай ён падвозіў у паліклініку іншага мужчыну з 9-гадовым дзіцем. Падчас паездкі дзіця адчула сябе дрэнна і запэцкала аўтамабіль.
Бацька разлічыўся з кіроўцам, даўшы больш грошай, але паабяцаў да вечара на нумар мабільнага тэлефона залічыць дадатковую суму, якая пакрые выдаткі на хімчыстку салона аўтамабіля. Але не дачакаўшыся грашовага пераводу ад пасажыра, кіроўца таксі ў нецвярозым стане паспрабаваў зайсці ў дом і забраць грошы, пагражаючы нажом.
Прычым раней ён ужо быў судзімы за хуліганства.
