Надзея Саяпіна. Фота Дар'і Буракінай
Мастачка Надзея Саяпіна, аўтар перфоманса «Здабытак» аб карцінах з калекцыі Белгазпрамбанка, была затрыманая сёння ў Мінску. Пра гэта TUT.BY паведамілі яе родныя.
Па іх словах, каля 8 раніцы да Надзеі прыйшлі дадому супрацоўнікі Савецкага РУУС горада Мінска. Яны паказалі пасведчанні і запрасілі праехаць з імі, каб азнаёміцца з матэрыяламі справы аб удзеле ў масавых несанкцыянаваных мерапрыемствах. Нібыта аб затрыманні гаворка не ішла. Надзеі пагражаў штраф у 25 базавых.
Пры гэтым, як сцвярджаюць родныя, Надзея жыве на тэрыторыі іншага раёна (Першамайскага) і не адносіцца да Савецкага РУУС.
Праз некаторы час стала вядома, што Саяпіну вязуць на Акрэсціна, дзе яна будзе знаходзіцца ў чаканні суда. Яе тэлефон недаступны.
Сям'я мастачкі занятая пошукам адваката і спрабуе перадаць для яе перадачу.
У ліпені Надзея Саяпіна арганізавала перфоманс «Здабытак». Падчас яго дзеячы культуры і мастацтва прымацавалі да сваіх спінаў рэпрадукцыі работ, раней канфіскаваных з калекцыі Белгазпрамбанка, і на працягу некалькіх гадзін стаялі насупраць QR-кодаў на сценах.
