Як паведаміла sb.by прадстаўнік Мінабароны Іна Гарбачова, пакуль пытанне знаходзіцца ў прапрацоўцы, Міністэрства працуе над праектам закона. Але народнае апалчэнне будзе складовай часткай тэрытарыяльнай абароны.
«Народнае апалчэнне — гэта форма аператыўнага супрацьстаяння агрэсару. Форма не новая, але блізкая да традыцый і ментальнасці беларусаў. Гэта той жа самы партызанскі рух. Самае галоўнае: яно павінна быць кіраваным, яму абавязкова патрэбны штаб», — сказала прэс-сакратар.
Вось што вядома пра апалчэнне.
Хто можа запісацца ў народнае апалчэнне?
Да ўдзелу ў народным апалчэнні плануецца прыцягваць паўналетніх грамадзян, якія непрыдатныя да вайсковай службы або да тэрытарыяльнай абароны па стане здароўя, але не маюць перашкод да ўжывання зброі. На бязвыплатнай аснове, па ўласнай ініцыятыве.
Чым зоймецца народнае апалчэнне?
Падраздзяленні ствараюцца для вырашэння другарадных задач у месцах, якія не прадугледжваюць дзеянняў рэгулярных войскаў і сіл тэрытарыяльнай абароны, на аснове наяўных рэсурсаў і чалавечых магчымасцяў адпаведных тэрытарыяльных адзінак — вёсак, пасёлкаў, гарадоў. Кіраванне ажыццяўляецца мясцовымі органамі ўлады.
Народнае апалчэнне прызначанае для:
— аховы грамадскага парадку і садзейнічання ўчастковым інспектарам міліцыі;
— абароны ўласнасці ад марадзёрства і іншых супрацьпраўных замахаў;
— забеспячэння каменданцкай гадзіны і абмежавання руху транспартных сродкаў;
— вядзення разведкі, выяўлення калабарантаў, шпіёнаў і дыверсантаў.
Ці ўзброяць удзельнікаў народнага апалчэння?
Узбраенне атрадаў апалчэння, як правіла, уключае толькі стралковую зброю, асваенне якой не выклікае складанасцяў.
