Як піша The Times, нядаўняе даследаванне вучоных з Універсітэта Каларада (ЗША), вынікі якога апублікаваны ў часопісе Nature Human Behavior, сведчыць аб тым, што людзі для пабудовы доўгатрывалых адносін шукаюць падобных да сябе.
Навукоўцы прааналізавалі інфармацыю пра амаль 80 тысяч традыцыйных брытанскіх пар па 133 прыкметах, сабраную ў брытанскім біябанку. Акрамя гэтага яны правялі мета-аналіз 199 папярэдніх даследаванняў, у якіх разглядалася карэляцыя паміж партнёрамі па 22 характарыстыках. Карэляцыі будаваліся па шкале, у якой нуль адзначаў адсутнасць падабенства і 1 — поўнае супадзенне.
Як адзначаюць даследчыкі, найбольш высокай была карэляцыя адносна года нараджэння (0,87). Акрамя гэтага высокі ўзровень карэляцыі назіраўся па такіх пазіцыях, як рэлігійныя і палітычныя погляды, узровень адукацыі, ужыванне алкаголю ці курэнне.
Супадзенні назіраліся нават па такіх прыкметах, як узрост бацькоў, колер валасоў, нашэнне акуляраў, колькасць братоў і сясцёр у сям'і, агульны ўзровень шчасця, фінасавае задавальненне.
У той час, як антрапаметрычныя прыкметы (рост, вага) дэманстравалі значны ніжэйшы ўзровень карэляцыі. Так індэкс масы цела паказаў карэляцыю на ўзроўні 0,16.
Адным з найбольш дзіўных вынікаў стала тое, што амаль адсутнічала карэляцыя паміж экстравертнымі і інтравертнымі рысамі характару.
Як адзначаюць вучоныя, іх вынікі сведчаць аб тым, што нават у сітуацыях, калі мы думаем, што ў нас ёсць выбар, з кім будаваць адносіны, намі кіруюць механізмы, якіх мы цалкам не ўсведамляем, і мы выбіраем падобнага да сябе чалавека.
Для справядлівасці трэба адзначыць, што даследаванне паказала некалькі прыкмет, па якіх была адмоўная карэляцыя, што сведчыць на карысць меркавання аб прыцягненні супрацьлегласцей. Сярод іх — біярытмы («сава» і «жаўрук»), праблемы з слыхам, асноўная рука (праўша ці ляўша).
Вучоныя адзначаюць, што вынікі іх даследавання абвяргаюць многія генетычныя мадэлі, якія сцвярджаюць, што ўтварэнне пар у чалавека адбываецца выпадковым чынам. На самой справе партнёрскія адносіны з большай імавернасцю ўтвараюць людзі, як той казаў, «з адной гліны злепленыя».
Чытайце яшчэ:
Людзі, якія рэгулярна вітаюцца з суседзямі, маюць вышэйшы паказчык дабрабыту
